जीवन बीमकहरुले संकलन गरे रु.२ खर्ब प्रिमियम, सरकारी कम्पनीको प्रदर्शन कमजोर

काठमाण्डौ । जीवन बीमा कम्पनीहरुको व्यवसायमा उल्लेख्य सुधार देखिएको छ । नेपाल बीमा प्राधिकरणका अनुसार १४ जीवन बीमा कम्पनीले गत आर्थिक वर्ष २०८२÷८३ मा कुल २ खर्ब एक करोड ९१ लाख रुपैयाँ बराबरको बीमाशुल्क संकलन गरेका छन् ।  

बीमकहरुको यो व्यवसाय अघिल्लो आर्थिक वर्ष २०८१÷८२ को तुलनामा १२.४३ प्रतिशत बढी हो । उक्त आवमा जीवन बीमा कम्पनीहरुले १ खर्ब ७७ अर्ब ९० करोड रुपैयाँ बराबरको बीमाशुल्क आर्जन गरेका थिए ।  

गत आर्थिक वर्षमा सरकारी स्वामित्वमा रहेको राष्ट्रिय जीवन बीमा कम्पनी बाहेकका सबै कम्पनीको व्यवसाय उल्लेखनीय बढेको छ ।  

सर्वाधिक नेपाल लाइफ इन्स्योरेन्सले ५३ अर्ब ६८ करोड रुपैयाँ बराबरको प्रिमियम संकलन गरेको छ । कम्पनीको व्यवसाय अघिल्लो आवको तुलनामा १२.३४ प्रतिशत वृद्धि भएको छ ।  

त्यस्तै, नेशनल लाइफ इन्स्योरेन्सले २४ अर्ब ६८ करोड, एलआइसी नेपाललले २१ करोड २३ लाख, हिमालयन लाइफले १८ अर्ब ५६ करोड, सूर्यज्योति लाइफले १२ अर्ब ९० करोड, एशियन लाइफले १० अर्ब ४३ करोड, राष्ट्रिय जीवन बीमा कम्पनीले ९ अर्ब ६४ करोड, सिटिजन लाइफले ९ अर्ब १६ करोड, सानिमा रिलायन्स लाइफले ७ अर्ब ९९ करोड, आइएमई लाइफले ७ अर्ब ४५ करोड, मेट लाइफले ६ अर्ब ८६ करोड, रिलायबल नेपाल लाइफले ६ अर्ब ४२ करोड, प्रभु महालक्ष्मी लाइफले ६ अर्ब ३३ करोड र सन नेपाल लाइफले ४ अर्ब ६३ करोड रुपैयाँ बराबरको प्रिमियम संकलन गरेका छन् ।  

अघिल्लो आवको तुलनामा गत आवमा सर्वाधिक व्यवसाय ग्रोथ गर्नेमा भने आइएमई लाइफ रहेको छ । कम्पनीको व्यवसाय ३७.९६ प्रतिशतले वृद्धि भएको छ । यता राष्ट्रिय जीवन बीमा कम्पनीको व्यवसाय भने २.१९ प्रतिशतले घटेको छ ।