नबिल बैंकले बढायो लाभांश क्षमता, नाफामा समेत ३३ प्रतिशतको सुधार

BANKING
बुधबार, श्रावण २०,२०८३ 07:48:10

काठमाण्डौं । नबिल बैंक लिमिटेडले आफ्नो वित्तीय अवस्था सबल बनाउँदै सेयरधनीहरुका लागि लाभांश दिनसक्ने क्षमता बढाएको छ । बैंकले सार्वजनिक गरेको गत आवको चौथो त्रैमासम्मको अपरिष्कृत वित्तीय विवरण अनुसार बैंकले आफ्नो लाभांश क्षमता १९.१० प्रतिशत पुर्याएको छ ।

अघिल्लो आवको सोही अवधिसम्म भने बैंकको लाभांश क्षमता १४.२५ प्रतिशत मात्रै थियो । यस्तै बैंकको वितरणयोग्य मुनाफा समेत ३४.०७ प्रतिशतले बढेर ५ अर्ब १६ करोड रुपैयाँ पुगेको छ । अघिल्लो आवको चौथो त्रैमामससम्म भने यस्तो रकम ३ अर्ब ८५ करोड रुपैयाँमा सीमित थियो ।

यस्तै बैंकको ब्याज आम्दानी बढ्दा र इम्पेयरमन्ट चार्ज घट्दा नाफा उकासिएको छ । बैंकले समीक्षा अवधिसम्म ७ अर्ब ९० करोड रुपैयाँबराबरको खुद नाफा कमाएको छ । यो रकम अघिल्लो आवको सोही अवधिसम्म बैंकले आर्जन गरेको ५ अर्ब ९२ करोड रुपैयाँको तुलनामा ३३.४९ प्रतिशतले बढी हो ।

अघिल्लो आवमा १६ अर्ब ३२ करोड रुपैयाँबराबरको खुद ब्याज आम्दानी गरेको बैंकले समीक्षा अवधिसम्म भने १७ अर्ब ९ लाख आर्जन गरेको छ । खुद शुल्क तथा कमिशन आम्दानी समेत ३ अर्ब ४२ करोडबाट बढेर ३ अर्ब ५४ करोड पुगेको छ । अघिल्लो आवमा ९ अर्ब २३ करोड रहेको बैंकको सञ्चालन मुनाफा ११ अर्ब ५६ करोड पुगेको छ ।

चौथो त्रैमाससम्म बैंकको रिटेन्ड अर्निङ ३ अर्ब ८५ करोडबाट बढेर ५ अर्ब १६ करोड र रिजर्भको आकार समेत ३१ अर्ब ६२ करोडबाट बढेर ३४ अर्ब ६८ करोड पुगेको छ ।

बैंकको इम्पेयरमेन्ट चार्ज ४ अर्ब २० करोडबाट घटेर २ अर्ब ६७ करोडमा सीमित बनेको छ । खराब कर्जा अनुपात पनि ४.४८ प्रतिशतबाट घटेर ४.२० प्रतिशतमा सीमित बनेको छ ।

समीक्षा अवधिसम्म बैंकको प्रतिसेयर आम्दानी(ईपीएस) २८.३६ रुपैयाँ, प्रतिसेयर कुल सम्पत्तिको मूल्य २७१५.५० रुपैयाँ, प्रतिसेयर नेटवर्थ २४७.२८ रुपैया र तरलता अनुपात २८.८७ प्रतिशत कायम भएको छ ।