एनआईसी एशिया बैंकको कमब्याक, प्रोभिजनिङ घट्दा १८ करोड नाफामा

BANKING
शनिबार, श्रावण ३०,२०८३ 13:25:26

काठमाण्डौ । विगतमा ठूलो सञ्चित घाटा र खराब कर्जाको दबाबमा परेको एनआईसी एशिया बैंकले पछिल्लो समय नाफा कायम गर्न सफल भएको छ ।

गत आर्थिक वर्ष २०८२–८३ मा बैंकले १८ करोड १७ लाख रुपैयाँ खुद नाफा कमाएको छ । अघिल्लो आर्थिक वर्ष २०८१–८२ मा भने बैंकले ३ अर्ब ८७ करोड २० लाख रुपैयाँ घाटा ब्यहोरेको थियो ।

सो अवधिसम्म बैंकको कमिसन आम्दानीमा आएको सुधारसँगै इम्पेयरमेन्ट चार्ज अर्थात् प्रोभिजनिङ गर्नुपर्ने रकम घटेकाले नाफा वृद्धिमा टेवा पुगेको हो ।

बैंकको कमिसन आम्दानी १७.४२ प्रतिशत बढेर १ अर्ब ४२ करोड १६ लाख रुपैयाँ पुगेको छ । त्यस्तै, प्रोभिजनिङ रकम ६९.९६ प्रतिशत घटेर २ अर्ब ९१ करोड ७६ लाख रुपैयाँमा सीमित भएको छ । अघिल्लो आवमा बैंकको यस्तो रकम ९ अर्ब ७१ करोड ३८ लाख रुपैयाँ थियो ।

बैंकको खुद ब्याज आम्दानीमा भने सामान्य संकुचन देखिएको छ । अघिल्लो आवमा १० अर्ब १३ करोड रुपैयाँ ब्याज आम्दानी गरेको यो बैंकले गत आवमा ७ अर्ब ८४ करोड रुपैयाँ ब्याज आम्दानी गरेको छ ।

त्यस्तै, बैंकको प्रतिसेयर आम्दानी (ईपीएस) २५.९६ रुपैयाँ ऋणात्मक भएकोमा सुधार भई १.२२ रुपैयाँ धनात्मक भएको छ । यता प्रतिसेयर नेटवर्थ १७२.३२ रुपैयाँ, तरलता अनुपात ४७.८२ प्रीतशत, मूल्य आम्दानी अनुपात २६६.९० गुणा र कुल सम्पत्तिमा प्रतिफल ०.०५ प्रतिशत रहेको छ ।

बैंकको खराब कर्जा अनुपात भने सामान्य बढेर ९.२६ प्रतिशत पुगेको छ । पूँजीकोष अनुपात ११.१० प्रतिशत, कस्ट अफ फण्ड ४.०२ प्रतिशत, सीडी रेसियो ६१.०७ प्रतिशत, बेस रेट ५.८३ प्रतिशत, स्प्रेड दर ३.५० प्रतिशत र आरओई ०.७१ प्रतिशत रहेको छ ।

सो अवधिसम्म बैंकको वितरणयोग्य मुनाफा भने १४ अर्ब ८६ करोड ५० लाख रुपैयाँ ऋणात्मक अवस्थामा छ ।