केन्यामा हेलिकोप्टर दुर्घटना, इक्वेडरका गुप्तचर प्रमुखसहित सात जनाको मृत्यु

काठमाण्डौ । केन्यामा बुधबार भएको हेलिकोप्टर दुर्घटनामा इक्वेडरका गुप्तचर प्रमुख मिशेल सेन्सी कोन्टोगी र उनकी पत्नी स्टेफनी होलिहानसहित सात जनाको मृत्यु भएको छ। दुर्घटनामा मृत्यु हुनेमध्ये पाँच जना अमेरिकी नागरिक रहेको अमेरिकी विदेश मन्त्रालयले जनाएको छ।

केन्याको साम्बुरु काउन्टीमा भएको दुर्घटनामा इक्वेडरका गुप्तचर प्रमुख कोन्टोगी र उनकी पत्नी पनि परेका छन्। दुर्घटनामा हेलिकोप्टरमा सवार सबै सात जनाको मृत्यु भएको बताइएको छ।

Sponsored

Sponsored

केन्या सिभिल एभिएसन अथोरिटीका अनुसार हेलिकोप्टर लुइसाबा क्षेत्रमा रहेको संरक्षित वन्यजन्तु क्षेत्रबाट इवासो न्यीरो नदीतर्फ हवाई यात्रामा निस्किएको थियो। इवासो न्यीरो केन्याका विभिन्न क्षेत्र हुँदै बग्ने प्रमुख नदीमध्ये एक हो।

हेलिकोप्टर दुर्घटनाको कारण भने तत्काल खुल्न सकेको छैन। घटनापछि केन्याको यातायात मन्त्रालय तथा एयर एक्सिडेन्ट इन्भेस्टिगेसन विभागले दुर्घटनाबारे अनुसन्धान गर्ने भएका छन्।

अनुसन्धानका क्रममा हेलिकोप्टर दुर्घटनामा पर्नुको कारण, उडानका क्रममा देखिएको अवस्था तथा घटनासँग सम्बन्धित अन्य परिस्थितिबारे विस्तृत अध्ययन गरिने अधिकारीहरूले बताएका छन्।