टिमुरे भन्सार क्षेत्रबाट ३०० बढी गाडी बगे

AUTO
बुधबार, भाद्र १०,२०८३ 17:55:46

काठमाण्डौ। रसुवा जिल्लाको भोटेकोशी खोलामा बुधबार बिहान एक्कासि आएको भीषण बाढीका कारण नेपाल भित्रिन तयार अवस्थामा रहेका सयौं सवारीसाधन बगेका छन्। रसुवा भन्सार कार्यालय टिमुरेका अनुसार बाढीले ३०० भन्दा बढी विद्युतीय गाडी तथा ट्रक बगाएको प्रारम्भिक जानकारी प्राप्त भएको छ।

रसुवा भन्सार कार्यालयका प्रमुख राजेन्द्र ढुंगानाका अनुसार बाढीले भन्सार क्षेत्र पूर्णरूपमा तहसनहस बनाएको छ। बाढी आउँदा ती सवारीसाधन भन्सार जाँचपास हुने क्रममा रहेको उनले बताए।

‘त्यो सबै बगाएको छ। टिमुरे बजार र रसुवागढी नाकातर्फ ठाउँ–ठाउँमा रोकेर राखिएका गाडीको हिसाबकिताब नै छैन। बाटैभरि गाडी थिए,’ ढुंगानाले भने।

रसुवागढी भन्सारमार्फत वुलिङ, एमजी, आर्कफक्स, जेटोर, बेइक, बीवाईडी, नामी, ओमोडा एन्ड जेकोलगायतका विद्युतीय सवारीसाधन नेपाल भित्रिने गरेका छन्।

लक्ष्मी ग्रुपअन्तर्गत लक्ष्मी हुन्डाई प्रालिका जनरल म्यानेजर दीपक थपलियाका अनुसार बाढीका कारण कम्पनीका कति सवारीसाधनमा क्षति पुगेको भन्ने यकिन विवरण प्राप्त हुन सकेको छैन।

लक्ष्मी ग्रुपका आर्कफक्स, जेटोर र बेइक ब्रान्डका करिब ४० देखि ५० वटा गाडी चीनबाट नेपाल भित्रिने क्रममा रहेको उनले बताए। तर कम्पनीका प्रतिनिधिहरूसँग सम्पर्क हुन नसक्दा तीमध्ये कति गाडी भन्सार क्षेत्रमा थिए र कति अन्य स्थानमा थिए भन्ने यकिन हुन नसकेको उनको भनाइ छ।

बाढीका कारण बीवाईडीका सवारीसाधनमा समेत ठूलो क्षति पुगेको आशंका गरिएको छ। बीवाईडीका नेसनल सेल्स हेड आशुतोष गौतमका अनुसार नाडा र नाइमा बुक भएका सवारीसाधन ग्राहकलाई डेलिभरी दिन ठूलो संख्यामा गाडी रसुवागढी नाकातर्फ ल्याइँदै थिए।

उनका अनुसार केही गाडी भन्सार छुट्ने प्रक्रियामा समेत थिए। तर बाढीपछि नेपाल तथा चीनतर्फ रहेका सवारीसाधनको अवस्थाबारे यकिन जानकारी प्राप्त हुन सकेको छैन।

‘बाढीबाट कति गाडीमा क्षति पुग्यो भन्ने जानकारी पाउन सकिएको छैन। केही गाडी भन्सार छुट्ने क्रममा थिए। नेपाल र चीनतर्फ कति गाडी छन् भन्ने खबर छैन,’ गौतमले भने।

बाढीले रसुवा भन्सार क्षेत्र तथा आसपासमा ठूलो क्षति पुर्‍याएपछि सवारीसाधनको वास्तविक क्षतिको विवरण संकलन गर्न कठिनाइ भइरहेको छ। प्रभावित क्षेत्रमा सञ्चार तथा यातायातसमेत अवरुद्ध भएकाले कम्पनीहरूले आफ्ना प्रतिनिधि तथा सवारीसाधनको अवस्था यकिन गर्न सकेका छैनन्।