.gif)
.gif)
.gif)
.png)
काठमाण्डौ । नेपाल उद्योग वाणिज्य महासंघले चालु आर्थिक वर्षदेखि विद्युत् महसुलमा लागू गरिएको मूल्य अभिवृद्धि कर (भ्याट) तत्काल फिर्ता लिन सरकारसँग माग गरेको छ ।
विद्युत् औद्योगिक उत्पादन, व्यापार तथा पर्यटन क्षेत्रका लागि आधारभूत पूर्वाधार भएकाले यसमा थप कर लगाउँदा उत्पादन लागत, सञ्चालन खर्च, नगद प्रवाह तथा समग्र व्यावसायिक प्रतिस्पर्धात्मकतामा प्रत्यक्ष असर परेको महासंघको भनाइ छ ।
महासंघका अनुसार विद्युत् महसुलमा भ्याट थपिएपछि विशेषगरी उच्च ऊर्जा खपत गर्ने उद्योग, भ्याट छुटको कारोबार गर्ने व्यवसाय, साना तथा मझौला उद्यम र होटल तथा पर्यटन क्षेत्रको लागत बढेको भन्दै व्यवसायीबाट गुनासो आएको छ ।
कानुनअनुसार इनपुट ट्याक्स क्रेडिटको व्यवस्था भए पनि कर समायोजन तथा फिर्ताको प्रक्रिया र व्यवसायको प्रकृतिका कारण सबै व्यवसायले विद्युत्मा तिरेको भ्याट तत्काल वा पूर्ण रूपमा समायोजन गर्न नसक्ने अवस्था रहेको महासंघले जनाएको छ ।
यसले व्यवसायको सञ्चालन पूँजीमा दबाब सिर्जना गर्नुका साथै नयाँ लगानी, उद्योग विस्तार तथा रोजगारी सिर्जनामा समेत असर पुर्याउन सक्ने महासंघको दाबी छ ।
(1).gif)
विद्युत् लागत बढ्दा यसको भार अन्ततः वस्तु तथा सेवाको मूल्यमा जोडिएर उपभोक्तासम्म पुग्न सक्ने र समग्र मूल्यवृद्धिमा थप दबाब पर्न सक्ने महासंघले जनाएको छ ।
महासंघले विद्युत्को आन्तरिक खपत बढाउने, आयात प्रतिस्थापन गर्ने र निर्यात प्रवर्द्धनमार्फत औद्योगिकीकरणलाई गति दिनुपर्ने समयमा ऊर्जा लागत बढाउने नीतिले निजी क्षेत्रको लगानी तथा उत्पादन विस्तारमा चुनौती थपेको उल्लेख गरेको छ ।
यससँगै उद्योग तथा व्यवसायलाई नियमित, गुणस्तरीय र भरपर्दो विद्युत् आपूर्ति सुनिश्चित गर्न पनि महासंघले आग्रह गरेको छ । भोल्टेजमा हुने उतारचढाव, अचानक विद्युत् अवरोध तथा अन्य प्राविधिक समस्याका कारण उत्पादन र मेसिनरीमा हुने क्षति न्यूनीकरण गर्न आवश्यक व्यवस्था मिलाउनुपर्ने महासंघको माग छ ।
महासंघले विद्युत् महसुलमा भ्याट लगाउने व्यवस्था पुनरावलोकन गरी निजी क्षेत्रसँग व्यापक परामर्श गर्न तथा कर समायोजन र फिर्ता प्रक्रियालाई सरल, पारदर्शी र समयबद्ध बनाउन सरकारसँग आग्रह गरेको छ।
.png)
.gif)
.jpg)
(52).jpg)
.gif)
.gif)
प्रतिक्रिया
0 प्रतिक्रियाअहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।