सेयर बिक्रीमा १५ दिने पूर्वसूचना व्यवस्था संशोधन गर्न सेयरधनी संघको माग

काठमाडौं। नेपाल सेयरधनी संघले नेपाल धितोपत्र बोर्डले लागू गरेको आधारभूत सेयरधनीले सेयर बिक्री गर्नुअघि १५ दिन अगावै सार्वजनिक सूचना जारी गर्नुपर्ने व्यवस्थामा संशोधन गर्न माग गरेको छ।

नेपाल धितोपत्र बोर्डले २०८३/०५/०९ मा जारी गरेको पत्रको बुँदा नं. १ मा सूचीकृत कम्पनीका आधारभूत सेयरधनीले ५ प्रतिशत वा सोभन्दा बढी सेयर बिक्री गर्नुअघि १५ दिन अगावै सार्वजनिक सूचना जारी गर्नुपर्ने व्यवस्था गरेको छ।

नेपाल सेयरधनी संघले उक्त व्यवस्थाको सिद्धान्तसँग आफूहरू सहमत भए पनि यसको कार्यान्वयनको तरिकाप्रति गम्भीर आपत्ति जनाएको छ। संघका अनुसार यस्तो व्यवस्था दोस्रो बजारमा लगानी गरी आधारभूत सेयरधनी बनेका लगानीकर्तालाई नभई ठूला संस्थागत लगानीकर्तालाई लक्षित हुनुपर्ने निष्कर्ष छ।

संघले उक्त प्रावधानले साना लगानीकर्ता मर्कामा पर्नुका साथै बजारमा अनावश्यक आतंक सिर्जना गर्न सक्ने जनाएको छ। यसबाट बजारमा हल्ला र अस्थिरता बढ्न सक्ने तथा ‘ठूला लगानीकर्ता भाग्दैछन्’ भन्ने मनोविज्ञानका कारण राम्रो कम्पनीको सेयर मूल्यसमेत हल्लाकै भरमा घट्ने सम्भावना रहेको संघको भनाइ छ। यस्तो अवस्थामा साना लगानीकर्ता नै बढी प्रभावित हुने संघले जनाएको छ।

संघले संस्थागत पारदर्शिता बढाउनुपर्नेमा जोड दिँदै बजारलाई अस्थिर बनाउने मुख्य विषय ५ प्रतिशतभन्दा माथिको ठूलो परिमाणको संस्थागत वा प्रमोटर सेयर बिक्री भएकाले पारदर्शिताको व्यवस्था त्यहीँबाट सुरु हुनुपर्ने जनाएको छ।

संघले नेपाल धितोपत्र बोर्डसमक्ष २०८३/०५/०९ मा जारी गरिएको पत्रको बुँदा नं. १ संशोधन गर्न माग गरेको छ। संघले दोस्रो बजारमा सेयर खरिद गरी आधारभूत सेयरधनी भएका सेयरधनीको हकमा ‘१५ दिन अगाडि सार्वजनिक सूचना’ दिनुपर्ने व्यवस्था लागू नहुने गरी तत्काल निर्देशिका सच्याउन तथा यस विषयमा लगानीकर्तामाझ स्पष्ट धारणा सार्वजनिक गर्न बोर्डसमक्ष अनुरोध गरेको छ।