चिनियाँबाट बरामद साढे २१ किलो सुन भन्सारमा, ‘नेक्सस’ खोज्दै प्रहरी

NEWS
सोमबार, आश्विन २६,२०८३ 12:35:13

काठमाण्डौ । बूढानीलकण्ठबाट तीन चिनियाँ नागरिकसहित बरामद गरिएको २१ किलो ७५०.६८ ग्राम सुन प्रहरीले थप अनुसन्धान तथा कानुनी कारबाहीका लागि त्रिभुवन अन्तर्राष्ट्रिय विमानस्थल भन्सार कार्यालयमा बुझाएको छ।

काठमाडौं उपत्यका अपराध अनुसन्धान कार्यालयले सुनसहित पक्राउ परेका तीनै चिनियाँ नागरिकलाई समेत भन्सार कार्यालय पठाएको जनाएको छ।कार्यालयका एसएसपी सन्तोष खड्काका अनुसार भन्सारतर्फको अनुसन्धान अघि बढे पनि प्रहरीले तस्करीको सम्भावित सञ्जाल, सहयोगी र सुन ल्याइएको रुटबारे छुट्टै अनुसन्धान जारी राखेको छ। यसका लागि विभिन्न पक्ष समेटेर अनुसन्धान टोली परिचालन गरिएको उनले बताए।

प्रहरीले असोज २२ गते बूढानीलकण्ठको माथिल्लो भंगालस्थित एक घरमा छापा मारेर उक्त परिमाणको सुन बरामद गरेको थियो।बरामद सुनको सो दिनको बजार मूल्य करिब ५४ करोड ६० लाख रुपैयाँ रहेको प्रहरीले जनाएको छ।

छापा मारिएको घरबाट सुनका टुक्रा, बिस्कुट आकारका ढिक्का तथा लेसिलो अवस्थामा राखिएको सुनसमेत फेला परेको थियो। प्रहरीले सुन प्रशोधन र स्वरूप परिवर्तनमा प्रयोग हुने सामग्रीसमेत भेटेको थियो।

प्रहरीका अनुसार पक्राउ पर्नेमा चीनको जियाङ्सु ग्वाङडोङका २७ वर्षीय हान फिई, ४७ वर्षीय चोउ लङसिन र ३७ वर्षीय वाङ जियान्जेन छन्।उनीहरूले माथिल्लो भंगालमा सिंगो घर भाडामा लिएर सुन पगाल्ने तथा प्रशोधन गर्ने ‘कारखाना’ शैलीको सेटअप सञ्चालन गरेको आशंका प्रहरीले गरेको छ।

बरामद सुन नेपाल भित्र्याउन हवाई मार्ग प्रयोग भएको हुनसक्ने प्रारम्भिक आशंका गरिए पनि यसको स्रोत, रुट र अन्तिम गन्तव्यबारे अनुसन्धान टुंगिएको छैन।प्रहरी अब पक्राउ परेका तीन चिनियाँ नागरिक मात्र होइन, उनीहरूलाई नेपालमा सहयोग गर्ने सम्भावित व्यक्ति, सुन आपूर्ति गर्ने नेटवर्क र त्यसको वितरण शृङ्खलासम्म पुग्ने प्रयासमा छ।