दसैंको मुखमा ग्यास अभाव, सिफलमा लाइन; सिलिन्डर राख्नसमेत पैसा तिरेको गुनासो

NEWS
सोमबार, आश्विन २६,२०८३ 16:37:58

काठमाण्डौ । दसैं नजिकिँदै गर्दा काठमाडौंसहित विभिन्न स्थानमा खाना पकाउने एलपी ग्यासको अभाव देखिएको छ। माग बढेका बेला आपूर्ति सहज नहुँदा उपभोक्ता खाली सिलिन्डर बोकेर लाइन बस्न बाध्य भएका छन्।

काठमाडौंको सिफल क्षेत्रमा केही दिनदेखि ग्यास लिन उपभोक्ताको लाइन देखिएको छ। उपभोक्ताले समयमा ग्यास नपाएको, कतिपयले लामो समयदेखि खाली सिलिन्डर राखेर पालो कुर्नुपरेको र केही ग्यास पसलसमेत बन्द रहेको गुनासो गरेका छन्।

लाइन व्यवस्थापनको नाममा रातभर बाहिर सिलिन्डर राख्नुपर्दा ५० रुपैयाँसम्म तिर्नुपरेको उपभोक्ताले बताएका छन्।

दसैंमा ग्यास अभाव हुन नदिन काठमाडौं उपत्यकाका विभिन्न ६ स्थानबाट ग्यास वितरण तथा सिलिन्डर साट्ने व्यवस्था सुरु गरिएको छ। तर, व्यवहारमा उक्त व्यवस्था सहज नभएको उपभोक्ताको गुनासो छ।

जुनसुकै कम्पनीको खाली सिलिन्डर साट्न सकिने भनिए पनि कतिपय ग्यास उद्योग तथा विक्रेताले आफ्नै ब्रान्डका सिलिन्डर मात्र स्वीकार गरेको उपभोक्ताले बताएका छन्।

चाडपर्वको मुखमा ग्यासको माग स्वाभाविक रूपमा बढ्ने भए पनि वितरण प्रणाली चुस्त नहुँदा सर्वसाधारणले सास्ती खेप्नुपरेको छ। विशेषगरी काठमाडौंका केही क्षेत्रमा खाली सिलिन्डरसहित लामो समय लाइन बस्नुपर्ने अवस्था देखिएको छ।

सरकारी निकायले ग्यास आपूर्ति सहज रहेको दाबी गरे पनि बजारमा देखिएको लाइन र उपभोक्ताको गुनासोले वितरण पक्षमा समस्या कायमै रहेको संकेत गरेको छ।