बाढीपहिरो र निर्माणका कारण विभिन्न राजमार्ग प्रभावित, केही सडक एकतर्फी

काठमाडौं। बाढी, पहिरो र निर्माण कार्यका कारण देशका विभिन्न स्थानका मुख्य राजमार्ग प्रभावित भएका छन्। नेपाल प्रहरीले सोमबार विवरण सार्वजनिक गर्दै केही सडक पूर्ण अवरुद्ध रहेको र केहीमा एकतर्फी यातायात सञ्चालन भइरहेको जनाएको छ।

प्रहरीका अनुसार बागमती प्रदेशको काभ्रेपलाञ्चोकस्थित बीपी राजमार्गको रोशी गाउँपालिकाका पिनथली र गिम्दिबेसीमा खसेको पहिरो पन्छाएपछि सडक एकतर्फी सञ्चालनमा आएको छ। पृथ्वी राजमार्गको बेनीघाट रोराङ–९ भालुवाटारमा भने पुल निर्माण तथा सडक स्तरोन्नतिका कारण सोमबार बिहान ११ देखि दिउँसो २ बजेसम्म पूर्ण रूपमा बन्द हुने भएको छ।

गण्डकी प्रदेशको गोरखास्थित आरुघाट गाउँपालिका–२ र ३ जोड्ने सोतिदेखि मान्बु जाने पुल बाढीले क्षति पुर्‍याएपछि असोज २५ गतेदेखि बन्द छ।

यस्तै, लुम्बिनी प्रदेशको अर्घाखाँचीस्थित सन्धिखर्क–गोरुसिङ्गे सडकको नरपानी र कर्णाली प्रदेशको सुर्खेतस्थित कर्णाली राजमार्गको बराहताल गाउँपालिका–७ औलिसेमा पहिरोका कारण एकतर्फी रूपमा मात्रै यातायात सञ्चालन भइरहेको प्रहरीले जनाएको छ।