प्रधानमन्त्रीले भने– एक महिनाभित्र सबै स्थानीय तहबाट भूमि प्रशासन सेवा सञ्चालन हुन्छ

काठमाडौं। प्रधानमन्त्री बालेन्द्र (बालेन) शाहले आगामी एक महिनाभित्र सबै स्थानीय तहबाट भूमि प्रशासनसम्बन्धी सेवा सञ्चालन गर्ने व्यवस्था मिलाइने बताएका छन् ।

सोमबार फेसबुकमार्फत धारणा सार्वजनिक गर्दै उनले संविधान र कानुनले दिएको अधिकारअनुसार स्थानीय तहबाटै भूमि प्रशासन सेवा प्रवाह गर्ने कार्यलाई सरकारले प्राथमिकता दिएको बताएका हुन्।

प्रधानमन्त्रीका अनुसार हालसम्म ३३ वटा स्थानीय तहबाट भूमि प्रशासनसम्बन्धी सेवा सञ्चालन भइसकेको छ। बाँकी स्थानीय तहमा पनि एक महिनाभित्र सेवा सुरु गर्ने निर्णय भएको छ।

संविधान, स्थानीय सरकार सञ्चालन ऐन, २०७४ र भूमि सम्बन्धी केही नेपाल ऐन संशोधन गर्ने अध्यादेश, २०८३ को व्यवस्थाअनुसार सेवा हस्तान्तरणको प्रक्रिया अघि बढाइएको उनले उल्लेख गरेका छन्।

यसका लागि आवश्यक सहयोग उपलब्ध गराउने सरकारको प्रतिबद्धता रहेको जनाउँदै शाहले यसबाट स्थानीय तहले आफ्नो संवैधानिक तथा कानुनी अधिकार प्रयोग गर्न पाउने र नागरिकले जग्गासम्बन्धी सेवा सहज रूपमा प्राप्त गर्ने विश्वास व्यक्त गरेका छन्।