नेप्सेको चार्टमा बन्यो हेड एण्ड सोल्डर प्याटर्न , कस्तो रहला बजारको आगामी यात्रा ?

काठमाण्डौ । यो साता सेयर बजारमा ५ दिन कारोबार भयो । ५ दिनको कारोबारमा बजार ४ दिन घट्यो भने १ दिन मात्रै बढ्यो । अघिल्लो साता २७२७.३६ विन्दुमा बन्द भएको बजार यो साता २६८८.५३ विन्दुमा बन्द भयो । यस हिसाबले यो साता सेयर बजार ३८.८३ अंकले बजार घट्यो । अघिल्लो साता पनि बजार २२.२५ अंकले घटेको थियो ।

यो साताको ५ कारोबारमा ४१ अर्ब ८२ करोड रुपैयाँबराबरकोे सेयर कारोबार भयो । अघिल्लो साता भने ५९ अर्ब ७७  करोडबराबरको कारोबार भएको थियो । यस हिसाबले यो साता नेप्से घट्दा कारोबार पनि घट्यो । यो साता बजार पूँजीकरण  ४२.७४ खर्ब रुपैयाँ पुग्यो । अघिल्लो साता बजार पू्ँजीकरण ४३ खर्ब ३६ अर्ब रुपैयाँ रहेको थियो । यस हिसाबले यो साता नेप्से घट्दा ६२ अर्बले बजार पूँजीकरण घटेको छ । यो साता नेप्से घट्दा बजार पू्ँजीकरण र कारोबार दुबै घट्यो ।  

 

हेड एण्ड सोल्डर प्याटर्न 

सेयर बजारले बनाएको रेखालाई मानविय आकृतिसँग दाँजेर हेर्न पनि सकिन्छ । कुनै पनि कम्पनीको सेयरको मूल्य तथा सूचकलाई ट्रेन्डलाइनमा प्रस्तुत गर्दा बनेको आकृतिलाई मानिसको २ वटा काँध तथा टाउको जस्तो अर्थात पासपोट फोटो जस्तो आकृति देखिएमा त्यसलाई हेड एण्ड सोल्डर प्याट्रनबाट भनिन्छ ।  

प्रायः बुल बजार इन्भर्टेड हेड एण्ड सोल्डरबाट सूरु हुन्छ भने वियरिस बजार ‘हेड एण्ड सोल्डर प्याट्रनबाट सूरु हुन्छ । यस्ता प्याटर्नहरु चार्टमा सधैं देखिदैनन् । विगतको नेप्सेको २६ बर्षको चार्टलाई नियाल्दा पछिल्लो पटकको २ वटा बुल अर्थात १८८१ र ३२०० विन्दुमा हेड एण्ड सोल्डर प्याटर्न  प्रष्ट रुपमा बनेर बुल सकिएको छ ।  

हालैको बुल पनि इन्भर्टेड हेड एण्ड सोल्डर बनेर नै सुरु भएको छ । यसर्थ पछिल्लो पल्ट बनेको हेड एण्ड सोल्डर प्याटर्नले नेपालका प्राविधिक विश्लेषकहरुको मनमा चिसो पस्नु स्वभाविक नै हो । तर अहिलेको सानो र्यालीमा नै बुल सकिएको भन्नु अपरिपक्वता हुनसक्छ । किनकी यस्तो प्याटर्न  डेढ–२ वर्षको बजारको बढोत्तरी पछि देखा परेको खण्डमा डराउनुपर्ने अवस्था हुन्छ ।  

छोटो समयको बढोत्तरीमा बनेको यस्तो हेड एण्ड सोल्डर इन्भ्यालिड पनि हुन सक्छ । यदि बजार आगामी कारोबारमा २७ सय भन्दा माथि–माथि टिकेर २७६० विन्दुभन्दा पनि माथि जान्छ भने यो प्याटर्न इन्भ्यालिड हुन सक्छ । त्यहाँबाट पनि बजार २८६० भन्दा माथि भोल्युमसहित गएको खण्डमा भने नेप्सेमा बनेका हेड एण्ड सोल्डर पूर्ण रुपमा इन्भ्यालिड हुनेछ । किनकी बजारले डाउ थेउरीमा फेरी हायर हाई र हायर लो का नयाँ सिरिज बनाउन सक्ने छ ।  

मूख्य तस्बिर माथि  

इचिमोकूको आधारमा  

इचिमोकु क्लाउड इन्डिकेटर सन् १९६८ मा एक जापनिज नागरिकले प्रतिपादन गरेका थिए । प्रतिपादनसँगै यो इन्डिकेटर त्यहाँस्थित एउटा टोकियो न्यूज पेपरमा प्रकाशित भएको थियो । योसँगै यो इन्डिकेटर संसारभर प्रयोगमा आएको हो ।  

अन्य इन्डिकेटरजस्तै यसमा पनि विभिन्न रेखाहरु र क्यान्डल स्टिकको गतिलाई चार्टमा राखेर विश्लेषण गरिन्छ ।

यो इन्डिकेटरअन्तर्गत हाल नेप्से बुलिस नै रहेको छ । मूल्य रेखाहरु क्लाउड पोजिसन भन्दा माथि–माथि नै चलेका छन् । क्लाउड पनि हरियो नै रहेको छ । यसकारण बजार क्लाउडको पोजिसन भन्दा माथि–माथि रहुन्जेल बजार बुलिस नै मानिने छ ।  

पिभट् प्वइन्टः  

पिभट् विश्लेषणमार्फत सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।  

बढेमा प्रतिरोध  

प्रतिरोध ३ – ३०१३

प्रतिरोध २ – २९३७

प्रतिरोध १–  २८३२

पिभट् प्वइन्टः २७५५

घटेमा सपोर्ट  

सपोर्ट १– २६५०

सपोर्ट २– २५७५

सपोर्ट  ३ –२४६९

निष्कर्षः साप्ताहिक रुपमा बजारलाई नियाल्दा यो सातासम्म बजार लगातार ४ साता करेक्सन आएको छ । तर यो साता भने बजार २६०० को विन्दुमा सपोर्ट लिएर २६८८ को विन्दुमा बन्द भएको छ । यस हिसाबले साप्ताहिक रुपमा ह्याम्मर प्रकृतिको क्याण्डल बनेको छ ।  

यसले बजार घट्न रोकिएको मान्न सकिन्छ । यो साता भोल्युम निकै ड्राई भएको छ । इलिअट वेभबाट बजारलाई नियाल्दा बजारमा माइनर डिग्रीको करेक्नसअन्तर्गत एबीसी करेक्सन करिब २६०० विन्दुमा सकिएको मान्न सकिन्छ । जसलाई आगामी एक–दुई कारोबार पछि मात्रै थप प्रस्ट हुन सक्छ ।  

(नोटः सेयर बजारमा लगानी जोखिमपूर्ण हुन्छ, यो विश्लेषण कारोबारका लागि सिफारिस भने होइन । )