ह्वात्तै बढ्यो सुनको मूल्य, प्रतिऔंस २७ सय डलरसम्म पुग्ने आँकलन

Gold
शुक्रबार, आश्विन ४,२०८१ 08:59:29

काठमाण्डौ । अन्तराष्ट्रिय बजारमा सुनको मूल्य १ प्रतिशतभन्दा बढीले बढेको छ । अमेरिकी केन्द्रीय बैंकले बिहिबार आधि प्रतिशत ब्याजदर कटौती गर्दै सहज मौद्रिक नीतिको प्रक्रियाको थालनी गरेसँगै आज अन्तराष्ट्रिय बजारमा सुनको मूल्यमा व्यापक वृद्धि भएको हो ।

आज सुनको मूल्य १.३० प्रतिशत अर्थात प्रतिऔंस ३३.३३ डलरले बढेको छ । यो समाचार तयार पार्दासम्म अन्तराष्ट्रिय बजारमा सुनको मूल्य २ हजार ५९२.३२ डलरमा कारोबार भईरहेको छ ।

बुधबार स्पट गोल्डको मूल्य प्रतिऔंस २ हजार ५९९ डलर पुगेको थियो । फेडले ब्याजदरमा गरेको कटौती र आगामी दिनमा पनि थप कटौती हुनसक्ने उच्च सम्भावनाका कारण सुनको मूल्य ह्वात्तै बढेको जानकार बताउँछन् । यसका साथै बढ्दो भू–राजनीतिक तनाव पनि यस वर्ष सुनको मूल्य बढ्नुको मुख्य कारक तत्व रहेको उनीहरुको तर्क छ ।

असुरक्षा र अनिश्चिनताका बेला सुनको लगानीलाई अति नै सुरक्षित मानिन्छ । यसका साथै न्यून ब्याजदर भएको बेला यसको मूल्य बढ्ने गर्छ । अमेरिका लगायत युरोपेली देशका केन्द्रीय बैंकहरुले ब्याजदरमा गरिरहेको कटौतीका कारण सुनको मूल्य थप वृद्धि हुने आँकलन गरिएको छ ।

विज्ञहरुले उच्च मागका कारण सुनको मूल्य प्रतिऔंस २७ सयसम्म पुग्न सक्ने प्रक्षेपण गरेका छन् ।

यस्तै आज चाँदीको मूल्य पनि ०.९२ डलरले बढ्दै प्रतिऔंस ३१.०९ डलर कायम भएको छ ।