विलिङको विङ्गो इभीमा नेपालभित्रका लागि छैन वारेन्टी, सस्तो कारको पछि लाग्दा ग्राहक फसे !

काठमाण्डौ । नेपालको अटो बजार पछिल्लो समय इभीमय छ । यही मौकामा व्यापारीहरुले छोटो समयमा पैसा कमाउने उद्देश्यले नेपालभित्र वारेन्टी नै नभएका कारहरु आयात गरी जथाभावी बिक्री गरिरहेका पाइएको छ । पछिल्लो उदाहरणको रुपमा विलिङ कम्पनीको बिङ्गो लगायतका विभिन्न ब्राण्डहरुलाई लिन सकिन्छ ।  

विलिङको विङ्गो इभी पछिल्लो समय पारामाउण्ट मोटर्सले नेपाल भित्र्याएर ग्राहक लोभ्याउने अफरसहित धमाधम बिक्री गरिरहेको छ । पारामाउण्टभन्दा अगाडि विलिङका इभीहरु नेपालमा इभी नेपाल मोटर्स(बज्र ग्रुपको सब्सिडरी)ले भित्र्याएको थियो । यी दुवै आयातकर्ताले नेपाल भित्र्याएका विलिङका विभिन्न नामका इभी एसयूभीमा नेपाली उपभोक्ताले स्वदेशमै वारेन्टी भने नपाउने अवस्था रहेको खुलासा भएको छ । 

विलिङको बिङ्गो कार भित्र्याएर बिक्री गरिरहेको पारामाउण्ट मोटर्सले विभिन्न सरकारी निकायमा पेश गरेको निर्यातकर्ता कम्पनीसँगको डिस्ट्रीब्यूसन अग्रीमेन्टमा यस्तो खुलासा भएको हो । त्यस्तो सम्झौतामा विलिङको बिङ्गो लगायतका इभी कारहरुको वारेन्टी चीन र इण्डोनेशिया टेरोटोरीमा मात्र हुने प्रष्ट लेखिएको छ । यसको अर्थ नेपालमा विलिङका इभी कारहरुको वारेन्टी उत्पादक तथा निर्यातकर्ता कम्पनीले दिएको छैन ।  

यसरी नेपाल टेरोटोरीमा वारेन्टी नै नभएका गुणस्तरहीन र लगानीका हिसाबले जोखिमपूर्ण इभीहरु पारामाउण्ट मोटर्स र इभी नेपालले बिक्री गरिरहेको खुलेको छ ।  

'नेपाल टेरोटोरीमा वारेन्टी छैन भन्नुको अर्थ यस्ता कम्पनीका इभीहरु किनेर भोलि वारेन्टी दाबी गर्न ग्राहकले नेपालभित्रै पाउने छैनन् । ग्राहकले कुनै समस्या भएर वारेन्टी दाबी गर्नुपरेमा कि त इण्डोनेशिया वा चीन नै पुग्नुपर्ने बाध्यता हुनेछ ।' एक सरकारी अधिकारीले बिजशालासँग भने-'गाडी बिक्री गर्ने बेलामा नेपाल टेरोटोरीका लागि वारेन्टी छ छैन भन्नेजस्तो सम्वेदनशील सूचना नै लुकाएको पाइयो । यसमा सम्बन्धित सरकारी निकायहरुले समेत बेवास्ता गरेका देखिन्छ । देशभित्रका उपभोक्ता विलिङका सस्ता इभीमा पैसा खन्याइरहँदा उनीहरुमाथि यति ठूलो धोकाधडी भइरहेको विषय गम्भीर छ । यसमा छानबिन हुनुपर्छ ।' 

पारामाउण्ट मोटर्सले सस्ता रेञ्जका इभी एसयूभीहरुमा ग्राहकको आकर्षण बढेको देखेर विलिङको बिङ्गो भित्र्याएको थियो । भित्र्याएलगत्तै बिङ्गोको मूल्य ३२ लाख कायम गरिएको थियो । तर, पछि नाडा अटो शोको अफरको नाम दिएर मूल्य २ लाख रुपैयाँ घटाएर ३० लाख कायम गरियो । यो मूल्यमा समेत सामान्य नेगोसिएसन गरी अझ कमसम्ममा पनि कार बिक्री भइरहेको पाइएको छ । तर, नेपाल टेरोटोरीमा वारेन्टी नभएकै कारण कम्पनीले विलिङको बिङ्गो इभी निकै सस्तोमा नेपाल भित्र्याएको स्रोतले बताएको छ । 'ग्राहकलाई वारेन्टी नै दिनु नपरेपछि मूल्य पनि सस्तो हुने भइहाल्यो ।' एक अटो व्यवसायीले भने-'विलिङ मात्र होइन, धेरै कम्पनीको इभीहरुमा यस्तै फ्रड भएको छ । यो विषयमा राज्यका निकायहरुले समेत चासो राख्नुपर्छ ।'  

स्रोतहरुले ग्राहकहरुले समेत विलिङ वा अन्य कुनै ब्राण्डका इभी खरीद गर्दै गर्दा लिखित वारेन्टी लिनुपर्ने सुझाएका छन् । सम्बन्धित कम्पनीले लिखित वारेन्टी नदिएको अवस्थामा इभीकै नाममा सस्तो दर देखेर पैसा नफसाउन समेत जानकारहरुको आग्रह छ ।  

नेपालभित्र वारेन्टी नै नभएको विलिङका इभी कार भित्र्याएर ग्राहकहरुलाई बिक्री गरिरहेको पारामाउण्ट मोटर्स एमजीका इभी ब्राण्डको समेत नेपालका लागि आधिकारिक बिक्रेता कम्पनी हो । एमजीका इभीहरुमा पनि पछिल्लो समय एकपछि अर्को समस्याहरु देखिएका थिए । एमजीका इभीहरुको त्रुटिपूर्ण इञ्जिनियरिङ तथा कमजोर सिस्टमका कारण एक कांग्रेसका नेताको छोरी कोमामै पुग्नुपर्ने अवस्था बनेको थियो । एमजीका इभीहरुमा केही ठाउँमा अचानक आगलागीका घटना पनि भएका थिए ।  

बिङ्गो इभीमा नेपाल टेरोटोरीमा वारेन्टी नै नभएको विषयमा पारामाउण्ट मोटर्सको प्रतिक्रिया लिन खोज्दा कुनै पनि जिम्मेवार व्यक्ति सम्पर्कमा आएनन् ।