चिनियाँ ईभी निर्मातालाई युरोपेली युनियनको झट्का, ५ वर्षसम्म ४५% कर लगाइने

काठमाण्डौ । युरोपेली युनियन(ईयु)ले चिनियाँ ईभी सवारी साधनहरुमा भारी कर लगाउने भएको छ । ईयुका अधिकांश देशहरुले समर्थन गरेपछि चिनियाँ ईभीमाथि युरोपमा भारी कर लगाउने तयारी भएको हो ।  

युरोपेली नेताहरुले चिनियाँ इभी अटो युरोपेली बजारका लागि खतरा बन्न सक्ने आकँलन गर्दै चीनबाट आयात हुने ईभी गाडीहरुमा भारी भन्सार शुल्क लगाउने निर्णय गरेका हुन् ।  

चीनमा निर्मित विद्युतीय सवारी साधनमा आगामी ५ वर्षसम्मका लागि ४५ प्रतिशत कर लगाइनेछ । तर यो निर्णयका कारण युरोपमा ईभी सवारी साधनहरुको मूल्य बढ्न सक्ने आशंका गरिएको छ । युरोप चिनियाँ ईभीका लागि ठूलो र महत्वपूर्ण बजार हो ।

पछिल्लो समय चीनको कार उद्योग व्यापक वृद्धि भएको छ । बीवाईडी जस्ता चिनियाँ कम्पनीले अन्तराष्ट्रिय बजारमा राम्रो प्रभाव छाड्न सफल भएका छन् । विश्व बजारमा चिनियाँ ईभी कम्पनीले आफ्नो प्रभुत्व विस्तार गरिरहेका छन् । चिनियाँ सस्ता कारहरुसँग स्थानिय कम्पनीहरुले प्रतिष्पर्धा गर्न नसक्ने त्रासका कारण युरोप जस्ता बजारहरु चिनियाँ कम्पनीको उपस्थितिलाई कम गर्न लागि परेका छन् ।  

ईयुले नयाँ भन्सार शुल्क गत जुलाई ४ देखि लागू गर्ने निर्णय गरेको थियो । तर यो निर्णय आगामी ५ वर्षका लागि लागू गर्ने कि नगर्ने भनेर शुक्रबार मतदान भएको छ । जसमा जर्मनीले विपक्षमा मतदान गरेको छ । जर्मनीको अटो क्षेत्र चिनियाँ आयातमा निर्भर रहेकाले जर्मनी चिनियाँ ईभीलाई कर लगाउने विषयको विपक्षमा उभिएको छ ।