यी दुई कम्पनीको सेयर आज किने घोषित लाभांश पाइने

काठमाण्डौ । दशैंअघिको अन्तिम कारोबार दिन लाभांश घोषणा गरिसकेका कम्पनीको सेयर सुरक्षित गरी रिटर्न बुक गर्न चाहनुहुन्छ भने तपाईका लागि सिटिजन्स बैंक र युनिलिभर नेपाल लिमीटेड विकल्प हुनसक्छन् । किनभने यी दुवै कम्पनीले साधारणसभा प्रयोजनका लागि तोकेको बुक क्लोज मितिअघि आज मात्र दोश्रो बजारमा कारोबार हुनेछ । 

सिटिजन्स बैंकले असोज २९ गते र युनिलिभर नेपाल लिमीटेडले असोज २८ गतेलाई बुक क्लोज मिति तोकेको छ । आज(असोज २३ गते) दोश्रो बजारमा कारोबार भएपछि बजार अब दशैंविदापछि मात्र खुल्छ । तसर्थ, यी दुवै कम्पनीले घोषणा गरेका लाभांश सुरक्षित गरी सेयरधनी बन्न चाहनेले आज कारोबार समयभित्र यी दुई कम्पनीको सेयर किनिसक्नुपर्नेछ ।  

सिटिजन्स बैंक इन्टरनेशनल लिमिटेडले आगामी कात्तिक १२ गते काठमाण्डौको डिल्लीबजारस्थित अमृतभोग पार्टी प्यालेसनमा आफ्नो १८ औं वार्षिक साधारणसभा बोलाएको छ ।

 कम्पनीले हाल कायम चुक्ता पूँजीको ४ प्रतिशतका दरले बोनस शेयर र सोको कर प्रयोजनार्थ ०.२१ प्रतिशत नगद लाभांश वितरण अजेण्डा पारित गर्दैछ । यो पटक बैंकले मर्जर र एक्वीजिसनको प्रस्तावलाई समेत पारित गर्ने योजना बनाएको छ।

उता, युनिलिभर नेपाल लिमीटेडले भने आगामी कात्तिक १२ गते नै काठमाण्डौको बानेश्वरस्थित द एभरेष्ट होटलमा ३१ औं वार्षिक साधारणसभा आह्वान गरेको छ ।  

सभाले प्रतिकित्ता १ हजार ७१४ रुपैयाँका दरले नगद लाभांश वितरण गर्ने प्रस्ताव पारित गर्नेछ ।  

यसरी सिटिजन्सको बोनस सेयर र युनिलिभरको नगद लाभांश प्राप्त गर्न चाहनेले आजै दोश्रो बजारबाट सेयर किनिसक्नुपर्नेछ ।