जानकी फाइनान्सको नाफा १५,७२३% ले वृद्धि, खराब कर्जा अनुपात ३४.६४% पुग्यो

काठमाण्डौ । जानकी फाइनान्स कम्पनी लिमिटेडको नाफा १५७२३ प्रतिशतले बढेको छ । कम्पनीले चालु आवको पहिलो त्रैमाससम्म ६ करोड ९० लाख रुपैयाँबराबरको खुद नाफा आर्जन गरेको छ । अघिल्लो आवको सोही अवधिसम्म भने कम्पनीले ४ लाख ३६ हजार रुपैयाँबराबरको खुद नाफा कमाएको थियो ।  

नाफा बढेपनि कम्पनीको खुद ब्याज आम्दानी भने ३.३९ प्रतिशतले घटेर ४ करोड ९३ लाख रुपैयाँमा सीमित बनेको छ । खुद शुल्क तथा कमिशन आम्दानीमार्फत १ लाख ६६ हजार रुपैयाँ कमाएको कम्पनीको खुद सञ्चालन आम्दानी १२ करोड ८५ लाख रुपैयाँ रहेको छ । यस्तै कम्पनीको सञ्चालन खर्च भने १६१.०९ प्रतिशतले बढेर २ करोड ९८ लाख रुपैयाँ पुगेको छ ।  

६९ करोड ४ लाख रुपैयाँ चुक्तापूँजी भएको कम्पनीको रिटेन्ड अर्निङ ६५ करोड २५ लाख रुपैयाँले ऋणात्मक र रिजर्भ भने ४३ करोड ९ लाख रुपैयाँले धनात्मक अवस्थामा छ । कम्पनीको निक्षेप ३ अर्ब ५७ करोड रुपैयाँबाट बढेर ४ अर्ब ३६ करोड रुपैयाँ पुगेको छ । यस्तै कर्जा प्रवाह भने ३ अर्ब १२ करोड रुपैयाँबाट घटेर ३ अर्ब ९ करोड रुपैयाँमा सीमित बनेको छ ।  

कम्पनीको खराब कर्जा अनुपात भने ह्वात्तै बढेको छ । अघिल्लो आवसम्म १७.६० प्रतिशत रहेको कम्पनीको खराब कर्जा अनुपात बढेर ३४.६४ प्रतिशत पुगेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस)४० रुपैयाँ, प्रतिसेयर नेटवर्थ ६७.९० रुपैयाँ, मूल्य आम्दानी अनुपात १७.३५ गुणा,प्रतिसेयर कुल सम्पत्तिको मूल्य ९४१.५९ रुपैयाँ र तरलता अनुपात ३.८४ प्रतिशत कायम भएको छ ।