ब्याज आम्दानी बढेसँगै बढ्यो सपोर्ट लघुवित्तको नाफा, खराब कर्जा र ईपीएसको कस्तो छ अवस्था ?

काठमाण्डौ । खुद ब्याज आम्दानी बढेसँगै सपोर्ट लघुवित्त वित्तीय संस्था लिमिटेडको खुद नाफा समेत वृद्धि भएको छ । चालु आवको पहिलो त्रेमाससम्ममा संस्थाको खुद नाफामा ६३.०८ प्रतिशतको बढोत्तरी आएको छ ।  

संस्थाले यो अवधिसम्ममा २६ लाख ६ हजार रुपैयाँ खुद नाफा आर्जन गरेको छ । अघिल्लो पहिलो त्रैमाससम्म भने संस्थाले १५ लाख ९८ हजार रुपैयाँ खुद नाफा आर्जन गरेको थियो ।  

संस्थाको खुद ब्याज आम्दानी पनि ३४.२९ प्रतिशतले बढेर १ करोड ९४ लाख रुपैयाँ पुगेको छ । संस्थाको कर्मचारी खर्च १ करोड ५२ लाख र अन्य सञ्चालन खर्च ६१ लाख ७५ हजार रुपैयाँ रहेको छ । संस्थाको सञ्चालन मुनाफा पनि बढेको छ । अघिल्लो आवको पहिलो त्रैमाससम्म २५ लाख ३६ हजार रुपैयाँ रहेको सञ्चालन मुनाफा बढेर २९ लाख ३८ हजार रुपैयाँ पुगेको छ ।  

अघिल्लो आवको पहिलो त्रैमाससम्म ५ करोड ३८ लाख रुपैयाँ रहेको संस्थाको रिजर्भको आकार बढेर ५ करोड ६० लाख रुपैयाँ पुगेको छ । संस्था खराब कर्जा अनुपात घटाउन सफल भएको छ । संस्थाको खराब कर्जा अनुपात १.६७ प्रतिशतबाट घटेर १.६४ प्रतिशतमा सीमित बनेको छ । संस्थाले सम्भावित घाटाका लागि ८ लाख २ हजार रुपैयाँ छुट्टाएको छ ।  

संस्थाले समीक्षा अवधिसम्म ३६ करोड २७ लाख निक्षेप संकलन र १ अर्ब ६७ करोड रुपैयाँबराबरको कर्जा प्रवाह गरेको छ ।  

समीक्षा अवधिसम्म संस्थाको प्रतिसेयर आम्दानी(ईपीएस) ९.६९ रुपैयाँ, प्रतिसेयर नेटवर्थ १५२.०५ रुपैयाँ, प्रतिसेयर कुल सम्पत्तिको मूल्य १ हजार ६७०.४० रुपैयाँ,मूल्य आम्दानी अनुपात १९०.७५ गुणा र तरलता अनुपात १०.९८ प्रतिशत कायम भएको छ ।