सीडीएससीमा १८ लाख ४० हजार मेरो सेयर खाता निष्क्रिय, कारण के हो ?

काठमाण्डौ । हाल सीडीएससी अर्थात सेन्ट्रल डिपोजटरी सर्भिस एण्ड क्लियरिङ सिस्टममा १८ लाख ४० हजार मेरो सेयर खाता निष्क्रिय रहेका छन् । सीडीएससीमा दर्ता भएका करिब ५४ लाख ९१ हजार मेरो सेयर खाताहरुमध्ये ३६ लाख ५० हजार ५७५ खाता मात्रै सक्रिय रहेका छन् ।  

यस हिसाबले १८ लाख ४० हजार खाता निष्क्रिय रहेको देखिन्छ । सीडीएससीका प्रवक्ता सुरेस न्यौपानेले दिएको जानकारी अनुसार यसरी निष्क्रिय हुनुमा हरेक आर्थिक वर्ष सकिएपछि डिम्याट खाता जसरी मेरो सेयर नविकरण अनिवार्य नहुनु नै मुख्य कारण हो । न्यौपानेका अनुसार आर्थिक वर्ष सकिएपछि डिम्याट नविकरण अनिवार्य हुन्छ । तर मेरो सेयर त्यसरी नविकरण अनिवार्य छैन ।  

लगानीकर्ता आफैले आईपीओ भर्दा वा सेयर कारोबार गर्दा आफूले चाहेको समयमा नविकरण गर्न सक्छन् । त्यसको एक वर्ष पछि मात्रै नविकरण गरे हुन्छ । त्यही कारण मेरो सेयरमा निष्क्रिय खाताको संख्या धेरै देखिएको हो । एक लगानीकर्ता राजेन्द्र विष्टले लामो समयदेखि आईपीओ नआएका कारण पनि धेरै लगानीकर्ता दोस्रो बजारमा निष्क्रिय रहँदा मेरो सेयरका खाता पनि निष्क्रिय भएका हुन् ।

अहिले धितोपत्र बोर्डमा अध्यक्ष पनि छैनन् । सेयर बजार पनि खासै चलायमान छैन । लकडाउनमा खाता खोलेका धेरै जसो दोस्रो बजारमा सक्रिय नहुँदा पनि मेरो सेयर निष्क्रिय रहेको विष्ट बताउँछन् । हाल दोस्रो बजारमा डिम्याटहोल्डरको संख्या ६४ लाख ३१ हजार ३५३ पुगेका छन् ।