विद्युत उत्पादनमा कमी आउदा अपर स्याङ्गे हाईड्रोको घाटा बढ्यो, रिजर्भ पनि १०.३६ करोडले ऋणात्मक

काठमाण्डौ । विद्युत उत्पादनमा कमी आई आम्दानी घट्दा अपर स्याङ्गे हाईड्रोपावर लिमिटेडको घाटा बढेको छ । कम्पनीले चालु आवको पहिलो त्रैमाससम्म १ करोड ३२ लाख रुपैयाँ घाटा व्यहोरेको छ ।  

अघिल्लो आवको समेही अवधिसम्म भने कम्पनीको घाटा १ करोड १७ लाख रुपैयाँ थियो । यो अवधिसम्म कम्पनीले ६३ लाख ५४ हजार रुपैयाँ विद्युत बिक्रीमार्फत आर्जन गरेको छ । यो रकम अघिल्लो आवको सोही अवधिको तुलनामा ५७.९२ प्रतिशतले कम हो ।  

यस अवधिमा हाईड्रोपावर परियोजनामा नियमित मर्मत तथा सम्भार कार्य केही ढिला हुन गई विद्युत उत्पादनमा कमी आएका कारण विद्युत आम्दानीमा गिरावट आएको कम्पनीले जनाएको छ ।  

कम्पनीको कर्मचारी खर्च १९ लाख ११ हजार रुपैयाँबाट घटेर २३ लाख ७२ हजार रुपैयाँ र प्रशासनिक खर्च १० लाख ९३ हजार रुपैयाँबाट बढेर २३ लाख २४ हजार रुपैयाँ पुगेको छ । कम्पनीको रिजर्भको आकार पनि १० करोड ३६ लाख रुपैयाँले ऋणात्मक अवस्थामा छ । कम्पनीले यो अवधिसम्म ३४ करोड २ लाख रुपैयाँ दीर्घकालिन र ४ करोड २४ लाख रुपैयाँ अल्पकालिन कर्जा लिएको छ ।  

समीक्षा अवधिसम्म कम्पनीको प्रतिसेयर आम्दानी २४.१८ रुपैयाँ ऋणात्मक, प्रतिसेयर नेटवर्थ ५२.९१ रुपैयाँ, प्रतिसेयर कुल सम्पत्तिको मूल्य २३९.०९ रुपैयाँ र तरलता अनुपात ३९.२२ प्रतिशत कायम भएको छ ।