चिनियाँ चिप निर्माता कम्पनीमाथि प्रतिबन्ध लगाए अमेरिकाविरुद्ध आवश्यक कदम चाल्ने चीनको चेतावनी

काठमाण्डौ । चीनले आफ्ना चिप निर्माता कम्पनीहरुलाई संरक्षण गर्न अमेरिका विरुद्ध आवश्यक कदम चाल्ने चेतावनी दिएको छ । बाइडेन प्रशासनले यो साताभित्र चिनियाँ चिपमाथि नियन्त्रण कायम राख्न आयातसम्बन्धी नयाँ प्रतिबन्ध जारी गर्न सक्ने खबर बाहिरिएसँग चीनले यस्तो चेतावनी दिएको हो ।  

गत साता अमेरिकी चेम्बर अफ कमर्सले आफ्ना सदस्यहरुलाई ई–मेल गर्दै बाईडेन प्रशासनले २ सय वटा चिनियाँ चिप निर्माता कम्पनीलाई कालोसूचीमा राखिने जानकारी दिएको थियो । यसले अधिकांश अमेरिकी आपूर्तिकर्तालाई चिनियाँ चिप आयात गर्न रोक लगाउने छ ।  

यस विषयमा बिहिबार नियमति पत्रकार सम्मेलनका क्रममा चिनियाँ वाणिज्य मन्त्रालयका प्रवक्ता हि यादोङले अमेरिकाको यो कदमको विरोध गर्दै अमेरिकाले राष्ट्रिय सुरक्षाको नाममा चिनियाँ कम्पनीहरुलाई निसाना साधिएको बताए ।  

चीनले उच्चतम प्रविधिमार्फत आफ्नो शैन्यशक्ति बलियो बनाउन सक्ने भयका कारण अमेरिकाले चिनियाँ सेमीकन्डक्टरमाथि नियन्त्रण राख्न चाहेको छ ।