भोल्भोले अमेरिकामा ५% कर्मचारी हटाउने

काठमाण्डौ । स्विडेनको बहुराष्ट्रिय लक्जरी कार निर्माता कम्पनी भोल्भोले अमेरिकामा ५ प्रतिशत कर्मचारी कटौती गर्ने भएको छ । कम्पनीले बुधबार अमेरिकामा रहेको चाल्र्सटन कारखानामा कार्यरत ५ प्रतिशत कर्मचारीलाई निकाल्ने र उत्पादन परिवर्तन गर्ने जनाएको हो ।  

बजारको बदलिदो अवस्था र अमेरिकी ट्यारिफ नीतिका कारण यस्तो निर्णय गरेको कम्पनीले जनाएको छ । कम्पनीका प्रवक्ताका अनुसार यो निर्णयबाट साउथ कारोलिनामा रहेको कारखानामा कार्यरत कुल २५ सय कर्मचारीमध्ये १२५ जना प्रभावित हुनेछन् । तर कुन तहका कर्मचारी प्रभावित हुने र यसले उत्पादनमा कस्तो प्रभाव पार्छ  भन्नेबारे भने उनले केही पनि खुलाएनन् ।  

भोल्भोमा अधिकांश हिस्सा चिनियाँ गिली होल्डिङको रहेको छ । यद्यपी कम्पनीले साउथ कारोलिनामा ४ हजार रोजगार सिर्जना गर्ने यसअघिको घोषणामा भने प्रतिबद्ध रहेको जनाएको छ ।  

सन् २०२४ को तथ्यांकअनुसार विश्वभर भोल्भोका करिब ४३ हजार कर्मचारी कार्यरत छन् । जसमध्ये युरोपमा २९ हजार,एशियामा १० हजार र अमेरिकी क्षेत्रमा ३ हजार कर्मचारी कार्यरत छन् ।  

अमेरिकाको चाल्र्सटनस्थित कारखानाको वार्षिक उत्पादन क्षमता करिब १ लाख ५० हजार युनिट रहेको छ । यो कारखानाबाट अहिले ईएक्स९० इलेक्ट्रिक एसयुभी र पोलस्टार मोडल थ्रि मात्रै उत्पादन भईरहेको छ । यहाँको अधिकांश उत्पादन युरोपमा आपूर्ति हुँदै आएको छ ।