निर्जीवन बीमा कम्पनीहरुको व्यवसाय १३.७१% ले बढ्यो, सर्वाधिक प्रिमियम भित्र्याउनेमा शिखर इन्स्योरेन्स

काठमाण्डौ । निर्जीवन बीमा कम्पनीहरुले ४४ अर्ब रुपैयाँ बराबरको प्रिमिमय संकलन गरेका छन् । नेपाल बीमा प्राधिकरणका अनुसार चालु आवको ११ महिनासम्ममा निर्जीवन बीमकहरुले ४४ अर्ब ३८ करोड ६४ लाख रुपैयाँ बराबरको प्रिमियम संकलन गरेका हुन् ।

यो व्यवसाय गत आवको सोही अवधिको तुलनामा १३.७१ प्रतिशत बढी हो । गत आवको ११ महिनाको अवधिमा निर्जीवन बीमकहरुले ३९ अर्ब ३ करोड ४४ लाख रुपैयाँ बराबरको प्रिमियम संकलन गरेका थिए ।

सो अवधिसम्म सबै कम्पनीको व्यवसायमा उल्लेख्य सुधार देखिएको छ । सबैभन्दा धेरै शिखर इन्स्योरेन्सले ५ अर्ब ६२ करोड रुपैयाँ बराबरको प्रिमियम संकलन गरेको छ । यो रकम गत आवको तुलनामा १०.५२ प्रतिशत बढी हो ।

त्यस्तै, दोस्रोमा सगरमाथा लुम्बिनी इन्स्योरेन्सले ४ अर्ब ७७ करोड ३९ लाख रुपैयाँ बराबरको प्रिमियम संकलन गरेको छ । कम्पनीको यो व्यवसाय गत आवको तुलनामा ६ प्रतिशत बढी हो ।

यसका साथै हिमालयन एभरेष्टले ४ अर्ब ७४ करोड, सिद्धार्थ प्रिमियरले ३ अर्ब ९२ करोड, आइजीआई प्रुडेन्सियलले ३ अर्ब ९१ करोड, नेकोले ३ अर्ब २८ करोड, एनएलजीले ३ अर्ब ७३ करोड, दि ओरियन्टलले २ अर्ब ८० करोड, युनाइटेड अजोडले २ अर्ब ७५ करोड, सानिमा जिआइसीले २ अर्ब ५५ करोड, नेपाल इन्स्योरेन्सले १ अर्ब ९७ करोड, प्रभु इन्स्योरेन्सले १ अर्ब ६४ करोड, राष्ट्रिय बीमा कम्पनीले १ अर्ब ४२ करोड र नेशनल इन्स्योरेन्सले १ अर्ब १९ करोड रुपैयाँ बराबरको प्रिमियम संकलन गरेको छ ।

गत आवको तुलनामा सबैभन्दा बढी व्यवसाय ग्रोथ गर्नेमा भने एनएलजी इन्स्योरेन्स रहेको छ । कम्पनीको व्यवसाय ३६.०२ प्रतिशतले बढेको छ ।