बाढीपीडितको उद्धारमा बैंकको साथ, जुटाए आधा अर्ब भन्दा बढी

काठमाण्डौ । गत  भदौ १० गते रसुवा र नुवाकोटलगायतका क्षेत्रमा आएको विनाशकारी बाढीबाट प्रभावित नागरिकको उद्धार, राहत तथा पुनःस्थापनाका लागि बैंकहरुले सक्रियता बढाएका छन् ।  

वाणिज्य तथा विकास बैंकहरूले संस्थागत सामाजिक उत्तरदायित्व (सीएसआर), सञ्चालक समिति तथा कर्मचारीको योगदानबाट करोडौँ रुपैयाँ सहयोग उपलब्ध गराएका छन् ।

हालसम्म प्राप्त तथ्याङ्कअनुसार वाणिज्य र विकास गरी २५ बैंकले आधा अर्ब रुपैयाँ राहत कोषमा संकलन गरेका छन् । हालसम्म १६ वाणिज्य बैंक र ९ विकास बैंकले आधिकारिक रुपमा सहयोग गरिसकेका छन् । ती बैंकहरुले प्रधानमन्त्री दैवी प्रकोप उद्धार कोषमा ५० करोड ९४ लाख ८६ हजार रुपैयाँ संकलन गरेका छन् ।  

वाणिज्य बैंकबाट मात्रै ४७ करोड ४८ लाख ११ हजार रुपैयाँ संकल भएको छ भने विकास बैंकहरुबाट ३ करोड ४६ लाख ७५ हजार रुपैयाँ संकलन भएको छ ।  

देशमा आएको यस्तो विपद्मा सहयोगको लागि बैंकहरुको सक्रियता तारिफयोग्य देखिन्छ । यसले विपद्को समयमा वित्तीय क्षेत्रले आफ्नो सामाजिक उत्तरदायित्वलाई राहत तथा पुनःस्थापनासँग जोड्दै लगेको देखाएको छ ।  

बैंकहरूको आर्थिक सहयोग तत्कालीन उद्धार, घाइतेको उपचार, खाद्यान्न तथा सुरक्षित आवासको व्यवस्थादेखि दीर्घकालीन पुनःनिर्माणसम्म उपयोग गर्ने उद्देश्य राखिएको छ । सरकारले बाढीपीडितका लागि सहयोग रकम प्रधानमन्त्री दैवी प्रकोप उद्धार कोषमार्फत एकद्वार प्रणालीबाट परिचालन गर्ने व्यवस्था गरेको छ ।  

बाढीबाट प्रभावित क्षेत्रमा सडक, पुल, घर तथा अन्य भौतिक संरचनामा क्षति पुगेकाले तत्काल राहतसँगै दीर्घकालीन पुनःस्थापनाका लागि थप स्रोत आवश्यक देखिएको छ । यस्तो अवस्थामा बैंक तथा निजी क्षेत्रको निरन्तर सहयोगले प्रभावित परिवारलाई सामान्य जीवनमा फर्काउन महत्वपूर्ण योगदान पु¥याउने अपेक्षा गरिएको छ ।

वाणिज्य बैंकहरुमा अब चार बैंक सहयोग गर्न बाँकी देखिएको छ । जसमा नबिल बैंक, स्ट्याण्डर्ड चार्टर्ड बैंक, नेपाल एसबिआई बैंक र सिटिजन्स बैंक रहेका छन् । जसमध्ये नबिल बैंकले चौधरी फाउन्डेशन र नबिल बैंकले संयुक्त रुपमा १५ करोड दिने घोषणा गरेको छ, तर यसको आधिकारिक चेक हस्तान्तरण भइसकेको छैन ।  

साथै नेपाल एबबिआई बैंकले पनि बाढीपीडितहरुका लागि राहत सामाग्री सहयोग गरिसकेको छ, तर प्रधानमन्त्री दैवी प्रकोप उद्धार कोषमा रकम संकलन गरेको कुनै आधिकारिता आइसकेको छैन ।  

त्यस्तै, स्ट्याण्डर्ड चार्टर्ड बैंक र सिटिजन्स बैंकले पनि सहयोग गरेको कुनै आधिकारिक समाचार आइसकेको छैन ।  

विकास बैंकहरुमा पनि ७ बैंकले हालसम्म सहयोगको कुनै आधिकारिक सूचना प्रकाशित गरिसकेका छैनन् । जसमा कर्पोरेट डेभलपमेन्ट बैंक, गरिमा विकास बैंक, ग्रीन डेभलपमेन्ट बैंक, सिन्धु विकास बैंक, नारायणी डेभलपमेन्ट बैंक, एक्सेल डेभलपमेन्ट बैंक र सप्तकोशी डेभलपमेन्ट बैंक रहेका छन् ।