क्यान्सरको चेतावनीपछि अमेरिकी र युरोपेली रक्सी उत्पादक कम्पनीको सेयरमूल्यमा व्यापक गिरावट

काठमाण्डौ । अमेरिकी सर्जन जनरलले मादक पदार्थजन्य पेयमा क्यानसरको चेतावनीपूर्ण सन्देश राख्नु पर्ने बताएपछि अमेरिकी र युरोपेली रक्सी उत्पादक कम्पनीको सेयरमूल्यमा गिरावट आएको छ ।  

अमेरिकी सर्जन जनरल विवेक मुर्थीले एडभाइजरीमा मादकपदार्थजन्य पेयले स्तन,कलेजो,कोलोन र अन्य क्यान्सर विकास गर्ने जोखिम बढाउने बताएका छन् । ‘प्रत्येक दिन रक्सी सेवन गर्नेलाई स्तन,मुख,घाटी जस्ता केही निश्चित क्यान्सरको विकास हुने जोखिम बढ्ने प्रमाणहरु फेला परेका छन्,’ एडभाइजरीमा विवेक मुर्थीले उल्लेख गरेका छन् ।  

मुर्थीको यस्तो भनाई सार्वजनिक भएसँगै शुक्रबार ज्याक ड्यानियलको माउ कम्पनी ब्राउन फोरम्यानको सेयरमूल्य झण्डै ३ प्रतिशतले घट्यो । यो गिरावटसँगै कम्पनीको सेयरमूल्य प्रतिकित्ता ३७.१० डलरमा सीमित बनेको छ । कम्पनीको यो मूल्य सन् २०१७ अप्रिल पछिकै न्यून हो ।  

यस्तै बियर उत्पादक कम्पनी मोल्सोन कुर्सको मूल्य पनि २.७ प्रतिशतले घट्यो ।  

कोरोना बियर उत्पादक कम्पनी कन्टलेसन ब्राण्डको मूल्य पनि १.३ प्रतिशतले ओरालो लागेको छ । अर्को बियर उत्पादक कम्पनी बोस्टोन बियरको मूल्यमा पनि ३ प्रतिशतको गिरावट देखियो ।

विवेक मुर्थीको सुझाव कहिले कार्यान्वयनमा आउछ भन्ने बारे अस्पष्टता रहेको छ । मादकपदार्थजन्य पेयको बोतलमा लेबलिङ गर्ने अन्तिम निर्णय कङ्ग्रेसले गर्ने जनाइएको छ ।  

युरोपमा पनि रक्सी उत्पादक कम्पनी डियागोको मूल्य ३.७ प्रतिशतले घटेको छ । मार्टेल काग्न्याग,मम स्याम्पेन र य्गासोल्युट भोड्का उत्पादन गर्ने फ्रान्सेली कम्पनी पर्नोड रिचार्डको मूल्य पनि करिब ३ प्रतिशतले घटेको छ । यस्तै इटालियन कम्पनी कामपारी र रेमीको मूल्य पनि ४.५ प्रतिशतले घटेको छ ।

बुडवाइजर बियर निर्माता कम्पनी बुस्च इनबेभको मूल्य २.७ प्रतिशत र हेन्सकेन र काल्सबर्गको मूल्य पनि १ प्रतिशतभन्दा बढीले घटेका छन् ।