लयमा फर्कदै सेयर बजार, जानकार भन्छन्,‘ पुस मसान्तको दबाब अन्त्य हुँदै’

काठमाण्डौ । साताको दोस्रो कारोबार दिन आज नेपाल स्टक एक्सचेञ्च(नेप्से) मा दोहोरो अंकको उछाल आएको छ । आज नेप्से परिसूचक १.८९ प्रतिशत अर्थात ४९.१२ अंकले बढेर २ हजार ६४०.६८ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.५१ प्रतिशतले बढेर ४४९.५९ विन्दुमा पुगेको छ । यो दिन नेप्सेमा सूचीकृत मध्ये ३१२ वटा स्क्रिप्टको १ करोड ५४ लाख ६१ हजार २६४ कित्ता सेयर ६ अर्ब ३० करोड ५४ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार अजयसिंह थापा(जयशम्भु) भन्छन्,  ‘आजको बढोत्तरीलाई पुस मसान्तको दबाब अन्त्य भएको भन्न सकिन्छ । केही दिन भोल्यमु ड्राई अप भएर आज बजारले गति लिएको छ । यसले कारोबारी र लगानीकर्तामा दुवैमा आत्मविश्वास बढेको मान्न सकिन्छ ।’

प्राविधिक रुपमा पनि अबको बजारमा २८ सय विन्दुसम्म टार्गेट राख्न सकिने उनले बताए ।  

अर्का बजार जानकार विरेन्द्र विष्टले पनि बजारमा पुस मसान्तको दबाब सकिएको,नयाँ गभर्नर आउने समय नजिकिएको र नकारात्मक समाचारको प्रभाव पनि कम हुँदै गएकाले माघ महिनाभित्र बजार ३ हजार विन्दुसम्म पु्ग्न सक्ने बताए ।        

यो दिन नेप्सेमा सूचीकृत १३ वटै समूहमा हरियाली छायो । आज हाईड्रो समूहमा सर्वाधिक उछाल आयो । यो समूह आज ३.५५ प्रतिशतले बढ्यो । यस्तै बैंकिङ समूह १.०९ प्रतिशत, विकास बैंक २.४६, वित्त १.१९, होटल २.९९,लगानी ३.२३,जीवन बीमा २.२९,उत्पादन तथा प्रशोधन समूह १.८९,लघुवित्त ०.७५,म्युचुअल फण्ड ०.६५,निर्जीवन बीमा १.०४,अन्य १.७६ र व्यापार समूह ०.४६ प्रतिशतले बढ्यो ।  

धेरै कारोबार गर्ने कम्पनीहरु

यो दिन एनआरएन इन्फ्रास्ट्रक्चरको सर्वाधिक सेयर कारोबार भयो । आज यो कम्पनीको २९ करोड ९ लाख बढीको कारोबार भयो । साहस उर्जाको पनि आज १३ करोड ६५ लाख,पिपुल्स हाईड्रोको १३ करोड५८ लाख,दोल्ती पावरको १२ करोड २ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा अपर सर्किट लाग्यो । आज आत्मनिर्भर लघुवित्त र सुपर मादी हाईड्रोको सेयरमूल्यमा मात्रै अपर सर्किट लाग्यो । साहस उर्जाको सेयरमूल्य पनि आज ८.७१ प्रतिशत,माया खोला हाईड्रोको ८.५९ र सप्तकोशी डेभलपमेन्ट बैंकको सेयरमूल्य ८.२५ प्रतिशतले बढ्यो ।  

उपकार लघुवित्त र सामुदायिक लघुवित्तको सेयरमूल्यमा आज लोअर सर्किट लाग्यो ।