लगातार ५ दिन बढ्यो नेप्से, कारोबार भने करिब १ अर्बले घट्यो

काठमाण्डौ । साताको तेस्रो कारोबार दिन आज नेपाल स्टक एक्सचेञ्च (नेप्से) सामान्य अंकले बढेको छ । आज नेप्से परिसूचक ०.२३ प्रतिशत अर्थात ६.१६ अंकले बढेर २ हजार ६४६.८४ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.१९ प्रतिशतले बढेर ४५०.४८ विन्दुमा पुगेको छ । यो दिन नेप्सेमा सूचीकृत मध्ये ३०५ वटा स्क्रिप्टको १ करोड २० लाख ८१ हजार ६०६ कित्ता सेयर ५ अर्ब ३८ करोड ४६ लाख रुपैयाँभन्दा बढीको कारोबार भएको  छ ।

यससँगै बजार लगातार ५ दिन बढेको छ । आजको कारोबार अघिल्लो दिनको तुलनामा कम हो । अघिल्लो दिन भने ६ अर्ब ३० करोड बढीको कारोबार भएको थियो ।  

आजको बजारबारे अर्थशस्त्री सूर्यनारायण पौडेल भन्छन्,‘बजारमा पुस मसान्तको दबाब विस्तारै सकिदै गरेको देखिन्छ । यद्यपी बजारमा केही उत्साह नभएका कारण लगानीकर्ता अझै पनि पर्ख र हेरको अवस्थामा छन् । बजारमा अहिले एक्युमुलेशन पनि चलेको हुन सक्छ । ’

पौडेलले नन फण्डामेन्टल कम्पनीले मात्रै बजारलाई उचाल्न नसकेको र कम्तीमा दैनिक १० अर्ब कारोबार भएपछि मात्रै बजारले गति लिएको मान्न सकिने बताए । प्राविधिक रुपमा यदि बजार २६७० विन्दुभन्दा माथि टिकेको खण्डमा बजारमा फेरि रौनक आउने सम्भावना रहेको समेत उनले बताए ।  

आजको बजारबारे बजार जानकार सुवासचन्द्र ढुंगानाले पनि केही दिनदेखि घटेको बजार सम्हालिन खोजेको र अहिले खरिदको अवसर रहेको बताए । ‘आज बजारमा केही नाफा बुक पनि चलेको छ । यदि बजार २६६० भन्दा माथि दुई दिनसम्म टिकेमा बजारले पुनः एकपटक २८०० विन्दुभन्दा माथिसम्म जान सक्छ,’ उनले भने ।    

यो दिन नेप्सेमा सूचीकृत १३ वटा समूहमध्ये ४ वटा बाहेक अन्य सबैमा हरियाली छायो । आज फाइनान्स समूह सर्वाधिक अर्थात २.६५ प्रतिशतले बढ्यो । विकास बैंक समूह पनि आज ०.८० प्रतिशत,हाईड्रो ०.४२,जीवन बीमा ०.६७,लघुवित्त ०.४४,म्युचुअल फण्ड ०.३५,निर्जीवन बीमा ०.४२ र व्यापार समूह ०.५९ प्रतिशतले बढ्यो । लगानी समूह आज अपरिवर्तित रह्यो ।  

बैंकिङ समूह आज ०.२७ प्रतिशत, होटल ०.०४,उत्पादन तथा प्रशोधन ०.२५ र अन्य समूह ०.१८ प्रतिशतले घट्यो ।  

धेरै कारोबार गर्ने कम्पनीहरु

यो दिन सिन्धु विकास बैंकको सर्वाधिक सेयर कारोबार भयो । आज यो कम्पनीको १६ करोड ९२ लाख बढीको कारोबार भयो । सप्तकोशी डेभलपमेन्ट बैंकको पनि आज १४ करोड ५९ लाख,साहस उर्जाको १४ करोड ४९ लाख, एनआरएन इन्फ्रास्ट्रक्चरको ९ करोड ८२ लाख र भूगोल इनर्जीको ९ करोड ७९ लाख बढीको कारोबार भएको छ ।  

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा अपर सर्किट लाग्यो । आज सप्तकोशी डेभलपमेन्ट बैंक, न्यादी हाईड्रोपावर,प्रभु महालक्ष्मी लाइफ र सिन्धु विकासको सेयरमूल्यमा अपर सर्किट लाग्यो ।  

यस्तै समृद्धि फाइनान्सको सेयरमूल्य ९.०६ प्रतिशत,सामुदायिक लघुवित्तको ८.६० र अपर हेवाखोलाको सेयरमूल्य ८.३७ प्रतिशतले बढ्यो ।  

यो दिन आत्मनिर्भर लघुवित्त र दोल्ती पावरको सेयरमूल्य सर्वाधिक अर्थात १० प्रतिशतले घट्यो । भूगोल इनर्जीको सेयरमूल्य आज ८.४६ प्रतिशत र उपकार लघुवित्तको सेयरमूल्य ५.६५ प्रतिशतले घट्यो ।