नेप्सेमा ७.३३ अंकको गिरावट, ‘अल्पकालिन लगानीकर्ता हाबी हुँदा राम्रा कम्पनीमा कम आकर्षण’

काठमाण्डौ । साताको अन्तिम कारोबार दिन आज पनि नेपाल स्टक एक्सचेञ्च(नेप्से) मा सामान्य अंकको गिरावट आएको छ । आज नेप्से परिसूचक ०.२८ प्रतिशत अर्थात ७.३३ अंकले घटेर २ हजार ५८८.६२ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.५४ प्रतिशतले घटेर ४३६.६२ विन्दुमा झरेको छ । यो दिन नेप्सेमा सूचीकृत मध्ये २९६ वटा स्क्रिप्टको १ करोड १७ लाख ४९ हजार ७०१ कित्ता सेयर ५ अर्ब ९३ करोड ३७ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार दामोदर गजुरेल भन्छन्,  ‘पछिल्लो समय बैंक तथा वित्तीय संस्था बारे नकारात्मक समाचार फैलिएको छ । सेयर बजारमा यो समूहको हिस्सा ठूलो भएकाले यो समूहमा दबाब पर्दा समग्र बजारनै प्रभावित बनेको छ ।’  

उनले ठूला बैंकहरुको वासलात र नगद प्रवाह जस्ता वित्तीय विवरण शंकाको घरेमा भएको बताए । लगानीकर्ताका लागि ढुक्कले लगानी गर्ने अवस्था समेत नभएको र समग्र अर्थतन्त्रमा सुधार नहुँदा कम्पनीहरुको व्यवसाय बढ्न नसक्दा त्यसको प्रभाव सेयर बजारमा परेको गजुरेलले बताए । ‘ पुस मसान्तको दबाब सकिएसँगै आगामी साता बजार सामान्य बढ्न सक्ने देखिन्छ,’ उनले भने ।    

अर्का बजार जानकार सरोज भट्टराईले पुस र माघ सेयर बजारका लागि अफ–सिजन भएकाले बजारमा हिजोआज खासै ठूलो अंकको वृद्धि नदेखिएको बताए । ‘सरकार परिवर्तनको हल्लाले समेत बजार प्रभावित बनेको छ । अस्थिर सरकारको अफवाहका कारण बजारमा ठूला लगानीकर्ताको प्रवेश देखिदैछ । जसका कारण बजारमा दिगोपन आउन सकेको छैन ।

बजारमा अल्पकालिन लगानीकर्ता हाबी हुँदा राम्रा कम्पनीमा आकर्षण कम देखिएकाले बजार बढ्न नसकेको उनले बताए । उनले भने,‘लगानीकर्ता अझै पनि पर्ख र हेरको अवस्थामै छन् । केही समयसम्म बजार यस्ता सामान्य उतारचढाव देखिन पनि सक्छ ।’  

यो दिन नेप्सेमा सूचीकृत १३ वटा समूहमध्ये ५ वटा समूहमा मात्रै हरियाली छायो भने अन्य ८ वटा समूहमा रातो पोतियो । आज व्यापार समूह सर्वाधिक बढ्यो । यो समूह आज २.०३ प्रतिशतले बढ्यो ।  

यस्तै हाईड्रो समूह आज ०.०७ प्रतिशत,म्युचुअल फण्ड ०.६८ र अन्य ०.३२ प्रतिशतले बढ्यो । फाइनान्स समूहमा भने आज सर्वाधिक गिरावट आयो । यो समूह आज ५.१९ प्रतिशतले घट्यो । बैंकिङ समूह आज ०.७४ प्रतिशत,विकास बैंक ०.८८,होटल ०.२२,लगानी ०.५८,जीवन बीमा ०.६१, लघुवित्त ०.५५ र निर्जीवन बीमा समूह ०.०६ प्रतिशतले घट्यो ।  

धेरै कारोबार गर्ने कम्पनीहरु

यो दिन सिन्धु विकास बैंकको सर्वाधिक सेयर कारोबार भयो । आज यो कम्पनीको २८ करोड ५७ लाख बढीको कारोबार भयो । एनआरएन इन्फ्रास्ट्रक्चरको आज २१ करोड १८ लाख,सानिमा मिडिल तमोरको १४ करोड ४२ लाख र जानकी फाइनान्सको १३ करोड ३३ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा अपर सर्किट लाग्यो । आज बोटलर्स नेपाल(बालाजु),विन नेपाल लघुवित्त,मन्दाकिनी हाईड्रोपावर र अपरहेवा खोला हाईड्रोको सेयरमूल्यमा अपर सर्किट लाग्यो ।  

पोखरा फाइनान्सको सेयरमूल्य आज सर्वाधिक अर्थात १० प्रतिशतले घट्यो । जानकी फाइनान्सको सेयरमूल्य पनि आज ९.३९ प्रतिशत,खानीखोला हाईड्रोको ९.१५ र रिलायन्स फाइनान्सको सेयरमूल्य ७.५७ प्रतिशतले घट्यो ।