आज पनि दोहोरो अंकले घट्यो नेप्से, फाइनान्समा भने देखियो आकर्षण

काठमाण्डौ । साताको दोस्रो कारोबार दिन आज पनि नेपाल स्टक एक्सचेञ्च(नेप्से) मा दोहोरो अंकको उछाल आएको छ । आज नेप्से परिसूचक ०.३९ प्रतिशत अर्थात १०.५४ अंकले घटेर २ हजार ६३३.३९ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.४६ प्रतिशतले घटेर ४४१.५३ विन्दुमा खुम्चिएको छ । यो दिन नेप्सेमा सूचीकृत मध्ये ३१२ वटा स्क्रिप्टको १ करोड ७२ लाख ५३ हजार ५७६ कित्ता सेयर ८ अर्ब ९२ करोड ४० लाख रुपैयाँभन्दा बढीको कारोबार भएको  छ ।

आजको बजारबारे बजार जानकार अजयसिंह थापा(जयशम्भु) भन्छन्,  ‘हिजो आजको करेक्सनले बजारमा अझै करेक्सन फेज नसकिएको देखिएको छ । अहिले बढ्ने सिजनमा समेत बजारले गति लिन सकेको छैन । बैंकिङ इन्डेक्सले बजारलाई सपोर्ट गर्न सकेको छैन ।’

उनले कोरोना कालपछि बजारमा ट्रेडिङ स्टकहरुको दबदबा रहेको बताए । जसका कारण लगानीकर्तामा विश्वासको कमी हुँदा बजारले खासै उचाई लिन नसकेको उनले बताए ।  

अर्का बजार जानकार दामोदर गजुरेलले बजारलाई आज कारोबारले सपोर्ट गरेको र स्मार्ट मनि बजार पसेको बताए । ‘ सेक्टर रोटेशन हुन नसक्दा हिजो आज बजारमा वृद्धि देखिएन । यद्यपी आज फाइनान्समा भने आकर्षण देखिएको छ’ उनले भने ।

गजुरेलले आज केही कम्पनीहरुमा नाफा बुक समेत भएको बताए ।    

यो दिन नेप्सेमा सूचीकृत १३ वटा समूहमध्ये ५ वटामा हरियाली छायो भने अन्य ८ वटा समूहमा रातो पोतियो । आज फाइनान्स समूह सर्वाधिक अर्थात ३.४६ प्रतिशतले बढ्यो । विकास बैंक समूह आज ०.७२ प्रतिशत,हाईड्रो ०.३५,उत्पादन तथा प्रशोधन ०.६७ र लघुवित्त ०.०४ प्रतिशतले बढ्यो ।  

व्यापार समूह आज सर्वाधिक अर्थात १.८३ प्रतिशतले घट्यो । बैंकिङ समूह पनि आज ०.५५, होटल ०.५१,लगानी ०.७७,जीवन बीमा १.१०,म्युचुअल फण्ड ०.६४,निर्जीवन बीमा ०.६७ र अन्य १.६६ प्रतिशतले घट्यो ।  

धेरै कारोबार गर्ने कम्पनीहरु

यो दिन सिन्धु विकास बैंकको सर्वाधिक सेयर कारोबार भयो । आज यो कम्पनीको २९ करोड ८३ लाख बढीको सेयर कारोबार भयो । सप्तकोशी डेभलपमेन्ट बैंकको आज २८ करोड १४ लाख,एनआरएन इन्फ्रास्ट्रक्चरको २६ करोड ८९ लाख र माउन्टेन इनर्जीको २६ करोड ३६ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा अपर सर्किट लाग्यो । आज न्यादी हाईड्रोपावर,जानकी फाइनान्स,ग्रिन डेभलपमेन्ट बैंक र सामुदायिक लघुवित्तको सेयरमूल्यमा अपर सर्किट लाग्यो ।  

बोटलर्स नेपाल(बालाजु)को सेयरमूल्य पनि आज ८.२४ प्रतिशत,आशा लघुवित्तको ६.९४ र नेपाल फाइनान्सको ६.८९ प्रतिशतले बढ्यो ।  

सप्तकोशी डेभलपमेन्टका बैंकका लगानीकर्ताले आज सर्वाधिक गुमाए । यो कम्पनीको सेयरमूल्य आज ८.४६ प्रतिशतले घट्यो । उपकार लघुवित्तको सेयरमूल्य पनि आज ६.५०,धौलागिरी लघुवित्तको ५.८५ र नेपाल हाईड्रो डेभलपर्सको सेयरमूल्य ५.४० प्रतिशतले घट्यो ।