धितोपत्र बोर्डको सञ्चालक समितिको बैठक आज बस्दै, नयाँ स्टक एक्सचेञ्जका विषयमा निर्णय हुनसक्ने

काठमाण्डौं । आज साँझ धितोपत्र बोर्डमा सञ्चालक समितिको बैठकमा बोलाइएको छ । धितोपत्र बोर्डका प्रवक्ता निरञ्जन घिमिरेले दिएको जानकारी अनुसार आज साँझ कार्यालय समयपछि बोर्ड बैठक डाकिएको हो ।

धितोपत्र बोर्डमा नयाँ अध्यक्ष आएपछि बस्न लागेको बोर्ड बैठकलाई पूँजी बजारमा चासोका रुपमा हेरिएको छ । गत साता मात्रै अर्थ मन्त्रालयले नयाँ स्टक एक्सचेञ्ज सञ्चालनको निर्णय मन्त्रिपरिषद्बाट पास गरि निर्णय कायान्वयनका लागि धितोपत्र बोर्डलाई पत्र पठाएको थियो । यसै सिलसिलामा बस्न थालको धितोपत्र बोर्डको बैठकलाई बजारमा अर्थपूर्ण रुपमा हेरिएको छ । बोर्डस्थित उच्च स्रोतले दिएको जानकारी अनुसार आज बस्ने धितोपत्र बोर्डको बैठकमा नयाँ स्टक एक्सचेञ्जको एजेण्डा मुख्य हुन सक्नेछ ।  

स्रोतका अनुसार नयाँ स्टक एक्सचेञ्जको लाइसेन्स प्रक्रिया कसरी अगाडी बढाउने भन्ने विषयमा पनि छलफल हुनेछ । यस अघि निवर्तमान अध्यक्ष रमेशकुुमार हमाल अध्यक्ष हुँदा तीन वटा संस्थाहरुले नयाँ स्टक एक्सचेञ्जको लाइसेन्सका लागि आवेदन दिएका थिए । उक्त तीन वटा संस्थाहरुमा हिमालयन स्टक एक्सचेञ्ज , नेशनल स्टक एक्सचेञ्ज र अन्नपूर्ण स्टक एक्सचेञ्ज रहेका छन् ।  

तर लामो समय अदालतमा मुद्दा समेत परेको कारण तत्कालिन सरकारले नयाँ स्टक एक्सचेञ्जको लाइसेन्स दिने विषय रोकेको थियो । त्यसपछि धितोपत्र बोर्डमा अध्यक्ष नहुँदा नयाँ स्टक एक्सचेञ्जको विषयमा अन्यौल्तामा छाएको थियो । यस कारण अब धितोपत्र बोर्डले नयाँ आवेदन माग्छ वा पुरानै आवेदन दिएका स्टक एक्सचेञ्जहरु मध्यबाट कसैलाई दिन्छ भन्ने सर्वाधिक चासोको विषय बनेको छ । तर बजार स्रोतले भने हिमालयन स्टक एक्सचेञ्जलाई नयाँ स्टक एक्सचेञ्जको लाइसेन्स दिने गरि हालको प्रक्रिया अगाडी बढेको दाबी गर्दै आएको छ ।  

नेपाल सरकारले गत पुस ५ गते बसेको मन्त्रिपरिषद् बैठकबाट नयाँ स्टक एक्सचेञ्जको लाइसेन्स दिने बाटो खोलेको थियो । सो बैठकले नेपाल राष्ट्र बैंकका पूर्वडेपुटी गभर्नर चिन्तामणि शिवाकोटीको संयोजकत्वमा गठित अध्ययन समितिको प्रतिवेदन अर्थ मन्त्रालय पठाउने निर्णय गरेको थियो । अध्ययन समितिको प्रतिवेदनमा नेपाल स्टक एक्सचेञ्जलाई पुनर्संरचना गर्दै नयाँ स्टक एक्सचेञ्जको लाइसेन्स दिन सकिने उल्लेख छ ।