दोहोरो अंकले घट्यो नेप्से, जानकार भन्छन्,‘उधारो कारोबारीले नाफा बुक गर्नु मुख्य कारण’

काठमाण्डौ । साताको तेस्रो कारोबार दिन आज नेपाल स्टक एक्सचेञ्च(नेप्से) मा दोहोरो अंकको गिरावट आएको छ । आज नेप्से परिसूचक ०.५१ प्रतिशत अर्थात १४.०८ अंकले घटेर २ हजार ७१५.९१ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.५४ प्रतिशतले घटेर ४५७.१२ विन्दुमा झरेको छ । यो दिन नेप्सेमा सूचीकृत मध्ये ३१५ वटा स्क्रिप्टको १ करोड ६९ लाख १७ हजार ८३५ कित्ता सेयर ८ अर्ब ९१ करोड ९६ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार विरेन्द्र विष्ट भन्छन्,  ‘आजको घटाई सामान्य करेक्सन मात्रै हो । आज अन्तिम समयमा राम्रो भोल्युम आएको छ । बजारमा भएको सहज तरलता, बलियो अर्थतन्त्र,राजश्वमा सुधार जस्ता सकारात्मक विषयले गर्दा बजार कुनैपनि बेला ३ हजार विन्दुमाथि जान सक्छ ।’

विष्टले नयाँ गभर्नर आउदै गदौ बजार असार–साउनसम्म ४ हजार विन्दुसम्म पुग्न सक्ने आँकलन गरे ।  

नेपाल इन्भेष्टर्स फोरमका उपाध्यक्ष राजन लम्साल भन्छन्,‘अहिले बजारमा उधारो कारोबार हुने भएकाले नाफा बुक भएको देखिन्छ । प्राविधिक विश्लेषकहरुले बजारको विषयमा नकारात्मक बोल्दा समेत बजारमा दबाब परेको छ । यद्यपी आगामी साताबाट भने बजारले लय लिनेछ ।’,  

उनले अहिले लगानी गर्न डराउनु पर्ने अवस्था भने नरहेको बताए ।  

यो दिन नेप्सेमा सूचीकृत १३ वटा समूहमध्ये २ वटा बाहेक अन्य सबैमा रातो पोतियो । आज अन्य समूह ०.४३ प्रतिशत र हाईड्रो समूह ०.१५ प्रतिशतले बढ्यो ।  

विकास बैंक समूहमा आज सर्वाधिक गिरावट आयो । यो समूह आज २.६० प्रतिशतले घट्यो । बैंकिङ समूह पनि आज ०.५७ प्रतिशत, फाइनान्स १.७०, होटल १.७९,लगानी ०.५०,जीवन बीमा ०.२४,उत्पादन तथा प्रशोधन १.१३,लघुवित्त ०.६४,म्युचुअल फण्ड ०.५४,निर्जीवन बीमा ०.५७ र व्यापार समूह ०.५२ प्रतिशतले घट्यो ।  

धेरै कारोबार गर्ने कम्पनीहरु

यो दिन एनआरएन इन्फ्रास्ट्रक्चरको सर्वाधिक सेयर कारोबार भयो । आज यो कम्पनीको ३० करोड ८७ लाख बढीको कारोबार भयो । नेपाल पुनर्बीमा कम्पनीको पनि आज २६ करोड ८४ लाख,हिमालयन उर्जाको २५ करोड ४० लाख,हिमालयन रि इन्स्योरेन्सको २१ करोड ४२ लाख र पिपुल्स हाईड्रोको १९ करोड २ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका एउटा कम्पनीको सेयरमूल्यमा मात्रै अपर सर्किट लाग्यो । आज जोशी हाईड्रोपावरको सेयरमूल्य ९.९८ प्रतिशतले बढ्यो । सामुदायिक लघुवित्तको सेयरमूल्य पनि आज ८.३० प्रतिशत,मध्यभोटे कोशीको ८.२५,न्यादी हाईड्रोको ८.१९ र उपकार लघुवित्तको सेयरमूल्य ८.१२ प्रतिशतले बढ्यो ।  

कर्पोरेट डेभलपमेन्ट बैंक,ग्रिन डेभलपमेन्ट बैंक र सिन्धु विकास बैंकको सेयरमूल्य आज सर्वाधिक अर्थात १० प्रतिशतले घट्यो । यस्तै सप्तकोशी डेभलपमेन्ट बैंकको सेयरमूल्य ९.९९ र धौलागिरी लघुवित्तको ४.७७ प्रतिशतले घट्यो ।