आज पनि घट्यो नेप्से, जानकार भन्छन्, ‘बजारमा अपरिपक्व लगानीकर्ता हाबी’

काठमाण्डौ । साताको दोस्रो कारोबार दिन आज पनि नेपाल स्टक एक्सचेञ्च९नेप्से० मा दोहोरो अंकको गिरावट आएको छ । आज नेप्से परिसूचक ०.४० प्रतिशत अर्थात १०.९८ अंकले घटेर २ हजार ६७७.३२ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.३४ प्रतिशतले घटेर ४५०.६५ विन्दुमा झरेको छ । यो दिन नेप्सेमा सूचीकृत मध्ये ३२२ वटा स्क्रिप्टको १ करोड ४४ लाख ४३ हजार ७६५ कित्ता सेयर ६ अर्ब ९६ करोड २ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार सरोज भट्टराई भन्छन्,  ‘सेयर बजारका लागि अहिले अफ सिजर्न जस्तै हो । इतिहास पल्टाएर हेर्ने हो भने यो समयमा यसअघि पनि बजारमा खासै ठूलो उतारचढाव आएको देखिदैन । लगानीकर्ताको मनोबल बढ्न नसक्दा समेत आज बजार घट्न पुगेको छ । ’

पछिल्लो समय बजारमा अपरिपक्व लगानीकर्ताको संख्या धेरै भएको र नीतिगत कुराभन्दा अफवाहको पछि लाग्ने प्रवृत्तिका कारण बजारमा सुधार नदेखिएको उनले बताए । ‘यतिबेला बजारमा छोटो समयमै प्रतिफल खोज्ने लगानीकर्ता धेरै देखिन्छन् । बजारमा फैलिने विभिन्न अफवाहको प्रवाह लामो समयसम्म नरहने भएकाले बजारले घिट्टै गति लिन पनि सक्छ,’ उनले भने ।  

बजारमा सबै कुरा सकारात्मक नै भएको तर लगानीकर्तामा आत्मविश्वासको कमीका कारण सेयर होल्डिङ हुन नसकिरहेको समेत भट्टराईले बताए ।  

अर्का बजार जानकार निमानन्द कंडेलले पनि बजारमा हाल साइडवेजमै चलिरहेको बताए । ‘बजारमा अझै केहि दिन करेक्सन फेज चल्न सक्छ । आउँदै गरेको मौद्रिक नीतिको समीक्षामा लगानीकर्ताले पूँजी बजारका लागि नीतिगत परिवर्तनको अपेक्षा गरेका छन्, ’ उनले भने ।  

उनले बजार साइडवेज चलेपनि डराईहाल्नु पर्ने अवस्था भने नरहेको बताए । समूहगत रुपमा भने लगानीकर्ताहरुले राम्रै आर्जन गरिरहेको उनले बताए ।    

यो दिन नेप्सेमा सूचीकृत २ वटा समूहमध्ये बाहेक अन्य सबैमा रातो पोतियो । आज अन्य समूह ०.२३ र व्यापार समूह ०.१० प्रतिशतले बढ्यो ।  

उत्पादन तथा प्रशोधन समूहमा आज सर्वाधिक गिरावट आयो । यो समूह आज २.०७ प्रतिशतले घट्यो । बैंकिङ समूह पनि आज ०.१७, विकास बैंक ०.२१, फाइनान्स १.२३, होटल ०.१७,हाईड्रो ०.७६,लगानी ०.४५,जीवन बीमा ०.६१,लघुवित्त ०.२७ र म्युचुअल फण्ड ०.१८ प्रतिशतले घट्यो । निर्जीवन बीमा समूह पनि ०.९१ अंकले घट्यो ।  

धेरै कारोबार गर्ने कम्पनीहरु

यो दिन नेपाल रिपब्लिक मिडियाको सर्वाधिक सेयर कारोबार भयो । आज सिईडीबी होल्डिङ्ग्सको पनि १५ करोड ३८ लाख, सप्तकोशी डेभलपमेन्ट बैंकको १४ करोड ५३ लाख,एनआरएन इन्फ्रास्ट्रक्चरको १४ करोड ४७ लाख र नेपाल पुनर्बीमा कम्पनीको १३ करोड ७९ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा अपर सर्किट लाग्यो । आज न्यादी हाईड्रो र गार्डियन माइक्रो लाइफको सेयरमूल्यमा अपर सर्किट लाग्यो ।  

यस्तै आज नेपाल रिपब्लिक मिडियाको सेयरमूल्य ८.८४ प्रतिशत, सप्तकोशी डेभलपमेन्ट बैंकको ५.७८ र मुक्तिनाथ कृषि कम्पनीको सेयरमूल्य ४.६१ प्रतिशतले बढ्यो ।  

यो दिन बोटलर्स नेपाल(तराई) र उपकार लघुवित्तको सेयरमूल्यमा आज लोअर सर्किट लाग्यो । सुपर मादी हाईड्रोको सेयरमूल्य पनि आज ८.२४ प्रतिशत,सामुदायिक लघुवित्तको ८.१० र अपर लोहरे खोलाको सेयरमूल्य ६.२५ प्रतिशतले घट्यो ।