सामान्य अंकले बढ्यो नेप्से, ‘लगानीकर्ता पर्ख र हेरको अवस्थामा’

काठमाण्डौ । साताको तेस्रो कारोबार दिन आज पनि नेपाल स्टक एक्सचेञ्च९नेप्से० मा सामान्य अंकको वृद्धि देखिएको छ । आज नेप्से परिसूचक ०.२४ प्रतिशत अर्थात ६.५४ अंकले बढेर २ हजार ६८३.८६ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स भने ०.११ प्रतिशतले घटेर ४५०.१५ विन्दुमा सीमित बनेको छ । यो दिन नेप्सेमा सूचीकृत मध्ये २९९ वटा स्क्रिप्टको १ करोड ३९ लाख ६८ हजार २५८ कित्ता सेयर ७ अर्ब २४ करोड ६२ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार अर्जुन थापा भन्छन्,  ‘लगानीकर्ता यतिबेला बैंकहरुको ब्याजदर घट्ने प्रतिक्षामा छन् । बैंकहरुमा प्रयाप्त तरलता हुँदा ब्याजदर ६–७ प्रतिशतसम्म झर्ने अपेक्षा लगानीकर्ताको रहेको छ । यदि लगानीकर्ताको अपेक्षाबमोजिम ब्याजदर घटेमा सेयर बजारमा लगानी बढ्ने निश्चित छ ।’

तर ब्याजदर घट्ने विषय एकिनताका साथ भन्न नसकिने समेत उनले बताए । ‘लगानीकर्ता यतिबेला पर्ख र हेर कै अवस्थामा छन् । समग्र बजार बढ्न लगानीकर्ताको मनोबल बढ्न आवश्यक देखिन्छ,’ उनले भने ।  

अर्का बजार जानकार टेकेन्द्र थपलियाले पनि लगानीकर्ता यतिबेला मौद्रिक नीतिको समीक्षा र बैंकहरुको ब्याजदरको प्रतिक्षामा रहेको बताए । ‘बजारमा सबै कुरा सकारात्मक नै छ । मौद्रिक नीतिको समीक्षा नजिकिदै गर्नु र बैंकहरुको ब्याजदर आउने समेत बेला भएकाले आजको बजारको बढाईले शुभ संकेत गरेको मान्न सकिन्छ । तर बजारको अवस्था यही नै हुन्छ भनेर भन्ने अवस्था भने अहिले छैन,’ उनले भने ।  

यो दिन नेप्सेमा सूचीकृत १३ वटा समूहमध्ये ५ वटामा हरियाली छायो भने ८ वटामा रातो पोतियो । विकास बैंक समूहमा आज सर्वाधिक वृद्धि देखियो । यो समूह आज २.३७ प्रतिशतले बढ्यो । हाईड्रो समूह पनि आज १.५७ प्रतिशत,लगानी ०.४८, उत्पादन तथा प्रशोधन ०.०१ र म्युचुअल फण्ड समूह ०.५२ प्रतिशतले बढ्यो ।  

व्यापार समूह आज सर्वाधिक अर्थात १.०५ प्रतिशतले घट्यो । बैंकिङ समूह पनि आज ०.२० प्रतिशत, फाइनान्स ०.२९, होटल ०.४७, जीवन बीमा ०.०८,लघुवित्त ०.०४,निर्जीवन बीमा ०.४३ र अन्य समूह ०.०१ प्रतिशतले घट्यो ।  

धेरै कारोबार गर्ने कम्पनीहरु

यो दिन सिईडिबि होल्डिङ्ग्सको सर्वाधिक सेयर कारोबार भयो । आज यो कम्पनीको ३६ करोड ८१ लाख बढीको कारोबार भयो । न्यादी हाईड्रोको ३५ करोड ११ लाख,युनाइटेड मोदी हाईड्रोको २१ करोड १७ लाख,एनआरएन इन्फ्रास्ट्रक्चरको १९ करोड ६९ लाख र सप्तकोशी डेभलपमेन्ट बैंकको १८ करोड ६२ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा अपर सर्किट लाग्यो । आज सिक्सेल हाईड्रो, भगवति हाईड्रोपावर, रसुवागढी हाईड्रो र गार्डियन माइक्रो लाइफको सेयरमूल्यमा अपर सर्किट लाग्यो ।  

यस्तै आज सप्तकोशी डेभलपमेन्ट बैंकको सेयरमूल्य ८.५२ प्रतिशत र इमर्जिङ नेपालको सेयरमूल्य ७.५६ प्रतिशतले बढ्यो ।  

भूगोल इनर्जीको सेयरमूल्य आज सर्वाधिक अर्थात १० प्रतिशतले घट्यो । यो दिन उपकार लघुवित्तको सेयरमूल्य ८.२९ प्रतिशत र ग्लोबल आइएमई लघुवित्तको सेयरमूल्य २.७७ प्रतिशतले घट्यो ।