नेप्सेमा झिनो अंकको वृद्धि, ४ वटा समूहमा मात्रै हरियाली

काठमाण्डौ । साताको चौथो कारोबार दिन आज नेपाल स्टक एक्सचेञ्च(नेप्से) मा झिनो अंकको वृद्धि भएको छ । आज नेप्से परिसूचक ०.०६ प्रतिशत अर्थात १.८६ अंकले बढेर २ हजार ६८५.७३ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.०५ प्रतिशतले बढेर ४५०.४० विन्दुमा पुगेको छ । यो दिन नेप्सेमा सूचीकृत मध्ये ३०७ वटा स्क्रिप्टको १ करोड ५५ लाख २० हजार ५५९ कित्ता सेयर ८ अर्ब ७१ करोड ७८ लाख रुपैयाँभन्दा बढीको कारोबार भएको  छ ।

आजको बजारबारे नेपाल पूँजी बजार लगानीकर्ता संघकी अध्यक्ष राधा पोखरेल भन्छिन्,  ‘यतिबेला सेयर बजारमा लगानीकर्ताको सेन्टिमेन्टले प्रभाव पारेको छ । अर्थमन्त्री पनि बजारको विषयमा सकारात्मक देखिएका छन् । पछिल्लो समय ब्याजदर पनि घट्दो क्रममा छ । यस्तै लगानीकर्ता राष्ट्र बैंकका गभर्नरको बहिर्गमनको प्रतिक्षामा छन् ।’

लगानीकर्ता अझै पर्ख र हेरको अवस्थामा भएको र मौद्रिक नीतिको समीक्षामा क्याप खारेजको प्रतिक्षामा समेत रहेको उनले बताइन् ।  

अर्का बजार जानकार शालिकराम ढकाल भन्छन्, ‘दुई दिन यता बजार घट्न रोकिएको जस्तो देखिएको छ । लगानीकर्तामा मनोबलको अभावका कारण बजारमा अहिले साइवेज चलिरहेको छ । मौद्रिक नीतिमा लघुवित्त कम्पनीहरुका लागि र मार्जिन कर्जालाई खुकुलो पार्ने नीति अबलम्बन गरिने अपेक्षा लगानीकर्ताको छ । ’  

यो दिन नेप्सेमा सूचीकृत १३ वटा समूहमध्ये ४ वटा बाहेक अन्य सबै समूहमा रातो पोतियो । आज फाइनान्स समूहमा सर्वाधिक वृद्धि देखियो । यो समूह आज १.५६ प्रतिशतले बढ्यो । विकास बैंक समूह पनि आज १.३३, लगानी १.२२ र जीवन बीमा ०.४८ प्रतिशतले बढ्यो ।  

व्यापार समूहमा आज सर्वाधिक गिरावट आयो । यो समूह आज ०.९१ प्रतिशतले घट्यो । बैंकिङ समूह पनि आज ०.०९ प्रतिशत,होटल ०.६३,हाईड्रो ०.०४,उत्पादन तथा प्रशोधन ०.३१,लघुवित्त ०.११,म्युचुअल फण्ड ०.०९,निर्जीवन बीमा ०.०३ र अन्य समूह ०.४७ प्रतिशतले घट्यो ।  

धेरै कारोबार गर्ने कम्पनीहरु

यो दिन एनआरएन इन्फ्रास्ट्रक्चरको सर्वाधिक सेयर कारोबार भयो । आज यो कम्पनीको ३९ करोड ६० लाख बढीको कारोबार भयो । सिईडिबि होल्डिङग्सको पनि आज ३७ करोड ६७ लाख,रिभर फल्स पावरको ३१ करोड ४९ लाख,न्यादी हाईड्रोको ३० करोड ४ लाख र सप्तकोशी डेभलपमेन्ट बैंकको २० करोड ३५ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका एउटा कम्पनीको सेयरमूल्यमा अपर सर्किट लाग्यो । आज गार्डियन माइक्रो लाइफको सेयरमूल्य ९.९९ प्रतिशतले बढ्यो । रिभर फल्स पावरको सेयरमूल्य पनि आज ८.०२ प्रतिशत,न्यादी हाईड्रोको ७.५९ र ग्रीन डेभलपमेन्ट बैंकको सेयरमूल्य ७.४६ प्रतिशतले बढ्यो ।  

उपकार लघुवित्त र सुपर मादी हाईड्रोको सेयरमूल्य आज सर्वाधिक घट्यो । यी दुवै कम्पनीको सेयरमूल्य आज १० प्रतिशतले घट्दै लोअर सर्किट लाग्यो । यो दिन रसुवागढीको सेयरमूल्य पनि आज ९.३० प्रतिशत र बाराही हाईड्रोको सेयरमूल्य ४.८३ प्रतिशतले घट्यो ।