आज पनि दोहोरो अंकले घट्यो नेप्से, जानकार भन्छन्, ‘बुलभित्रको करेक्सन’

काठमाण्डौ । साताको चौथो कारोबार दिन आज पनि नेपाल स्टक एक्सचेञ्च (नेप्से)मा दोहोरो अंकको गिरावट आएको छ । आज नेप्से परिसूचक ०.८८ प्रतिशत अर्थात २५.१६ अंकले घटेर २ हजार ८२१.१३ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.२० प्रतिशतले घटेर ४६९.५६ विन्दुमा खुम्चिएको छ । यो दिन नेप्सेमा सूचीकृत मध्ये ३०८ वटा स्क्रिप्टको २ करोड ३३ लाख ४३ हजार २०१ कित्ता सेयर १० अर्ब ९७ करोड २६ लाख रुपैयाँभन्दा बढीको कारोबार भएको  छ ।

आजको बजारबारे नेपाल इन्भेष्टर्स फोरमका निवर्तमान अध्यक्ष छोटेलाल रौनियार भन्छन्,  ‘केही दिनदेखि बढेको बजारमा आजको गिरावट नाफा बुक मात्रै हो । राम्रा कम्पनीहरुमा एक्युमुलेशन चलिरहेको छ । घट्दै–बढ्दै अघि बढ्ने बजार नै दीर्घकालमा मजबुत रहन्छ । अहिले बजार ठूलो अंकले घट्नु पर्ने कुनै पनि कारण छैन ।’

रौनियारले अहिले बजारमा सस्तो ब्याजदर र प्रयाप्त तरलता रहेको समेत बताए । अब बैंकिङ क्षेत्रपनि सम्हालिदै अघि बढ्ने भएकाले समग्र बजारमा समेत सकारात्मक प्रभाव देखिने उनले बताए ।  

सेयर लगानीकर्ता संघ नेपालका कार्यवाहक अध्यक्ष तारा फल्लेलले पनि आजको बजारको घटाईलाई सामान्य नाफा बुक भएको बताए । ‘यो बुल भित्रकै स्वभाविक करेक्सन हो । बजार घट्दा कारोबार पनि घटेकाले बजारमा प्यानिक सेल नरहेको जनाउछ ।’

उनले बजार केही दिनभित्रै सम्हालिने विश्वास व्यक्त गरे ।    

यो दिन नेप्सेमा सूचीकृत एउटा बाहेक अन्य सबै समूहमा रातो पोतियो । वटा समूहमध्ये २ वटा बाहेक अन्य सबैमा हरियाली छायो । आज व्यापार समूह मात्रै बढ्यो । यो समूह आज ०.४३ प्रतिशतले बढ्यो ।  

फाइनान्स समूह आज सर्वाधिक अर्थात १.५५ प्रतिशतले घट्यो । बैंकिङ समूह पनि आज १.०४ प्रतिशत,विकास बैंक १.३१, होटल १.०५, हाईड्रो ०.३७, लगानी १.२४, जीवन बीमा १.४५, उत्पादन तथा प्रशोधन ०.९४,लघुवित्त ०.५०,म्युचुअल फण्ड ०.१५,निर्जीवन बीमा १.५१ र अन्य समूह ०.७६ प्रतिशतले घट्यो ।  

धेरै कारोबार गर्ने कम्पनीहरु

यो दिन हिमालयन रि इन्स्योरेन्सको सर्वाधिक सेयर कारोबार भयो । आज यो कम्पनीको ९६ करोड ७० लाख बढीको कारोबार भयो । नेपाल पुनर्बीमा कम्पनीको पनि आज ९० करोड ३१ लाख, सगरमाथा जलविद्युतको ३० करोड ७९ लाख र एनआरएन इन्फ्रास्ट्रक्चरको २९ करोड ७६ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ३ वटा कम्पनीको सेयरमूल्यमा अपर सर्किट लाग्यो । आज समाज लघुवित्त,गार्डियन माइक्रो लाइफ र उन्नती सहकार्य लघुवित्तको सेयरमूल्यमा अपर सर्किट लाग्यो ।  

यस्तै मोउन्टेन हाईड्रोको सेयरमूल्य आज ८.८२ प्रतिशत र गुराँल लघुवित्तको सेयरमूल्य ७.४२ प्रतिशतले बढ्यो ।  

ग्रीन डेभलपमेन्ट बैंकको सेयरमूल्यमा आज सर्वाधिक गिरावट आयो । यो बैंकको सेयरमूल्य आज ६.८४ प्रतिशतले घट्यो । सप्तकोशी डेभलपमेन्ट बैंकको सेयरमूल्य आज ५.५१ प्रतिशत र उपकार लघुवित्तको सेयरमूल्य ४.७५ प्रतिशतले घट्यो ।