नेप्सेमा गिरावटका साथ साताको सुरुवात, जानकार भन्छन्, ‘राजनीतिक विषयले बजार घट्दै छ’

काठमाण्डौ । साताको पहिलो कारोबार दिन आज पनि नेपाल स्टक एक्सचेञ्च (नेप्से) मा दोहोरो अंकको गिरावट आएको छ । आज नेप्से परिसूचक ०.७९ प्रतिशत अर्थात २१.६३ अंकले घटेर २ हजार ७१४.८५ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.८९ प्रतिशतले घटेर ४५४.९१ विन्दुमा झरेको छ । यो दिन नेप्सेमा सूचीकृत मध्ये ३१६ वटा स्क्रिप्टको १ करोड ३९ लाख ७४ हजार ४५२ कित्ता सेयर ६ अर्ब ८३ करोड ६६ लाख रुपैयाँभन्दा बढीको कारोबार भएको  छ ।

आजको बजारबारे अर्थशास्त्री सूर्यनारायण पौडेल भन्छन्,  ‘अहिले बजार विशेष गरेर २–३ वटा कारणले घटेको छ । पहिलो भनेको राजनीतिक विषय नै हो । त्यसैगरी अन्तराष्ट्रिय सेयर बजारमा समेत गिरावट आउदा त्यसको प्रभाव नेपाली बजारमा परेको छ । गत साता केही इन्भेष्टमेन्ट कम्पनीका बारेमा आएको खबरले समेत बजार प्रभावित बनेको छ ।’

उनले नयाँ गभर्नर आउने भनेर उचालिएको बजारले करेक्सन लिएको हुनसक्ने समेत आँकलन गरे । पौडेलले यस्तो बेला संस्थागत लगानीकर्ताले आफ्नो उपस्थिती जनाउन नसकेको समेत गुनासो गरे ।  

अर्का बजार जानकार विरेन्द्र विष्टले पनि अहिले बजार घट्नुमा राजनीतिक विषय नै मुख्य कारण भएको बताए । विष्टले केही दिनमै बजार सम्हालिने समेत विश्वास व्यक्त गरे ।    

यो दिन नेप्सेमा सूचीकृत १३ वटा समूहमध्ये एउटा बाहेक अन्य सबैमा रातो पोतियो। आज व्यापार समूह मात्रै ४.९२ प्रतिशतले बढ्यो ।  

विकास बैंक समूह आज सर्वाधिक अर्थात २.२५ प्रतिशतले घट्यो । बैंकिङ समूह पनि आज ०.८० प्रतिशत, फाइनान्स १.३९, होटल ०.५३,हाईड्रो १.२९, लगानी १.७२,जीवन बीमा १.०६, उत्पादन तथा प्रशोधन ०.०१, लघुवित्त ०.८८, म्युचुअल फण्ड ०.०४,निर्जीवन बीमा ०.७२ र अन्य समूह १.५२ प्रतिशतले घट्यो ।  

धेरै कारोबार गर्ने कम्पनीहरु

यो दिन हिमालयन रि इन्स्योरेन्सको सर्वाधिक सेयर कारोबार भयो । आज यो कम्पनीको ५८ करोड ६६ लाख बढीको कारोबार भयो । महालक्ष्मी विकास बैंकको पनि आज ३७ करोड ३० लाख, घलेम्दी हाईड्रोको ३६ करोड ९४ लाख, नेपाल पुनर्बीमा कम्पनीको ३४ करोड १६ लाख र गार्डियन माइक्रो लाइफको २६ करोड २० लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका कुनैपनि कम्पनीको सेयरमूल्यमा अपर सर्किट लागेन । आज सामुदायिक लघुवित्तको सेयरमूल्य ५.३४ प्रतिशत,आरएसडीसी लघुवित्तको ४.४३ र अपर हेवाखोला हाईड्रोको सेयरमूल्य ४.१८ प्रतिशतले घट्यो ।  

ग्रीन डेभलपमेन्ट बैंकको सेयरमूल्य सर्वाधिक अर्थात ७.९१ प्रतिशतले घट्यो । पिपुल्स हाईड्रोको सेयरमूल्य पनि आज ७.३३ प्रतिशत र विन नेपाल लघुवित्तको सेयरमूल्य पनि ६.६३ प्रतिशतले घट्यो ।