लगातार ४ दिन घट्यो नेप्से, जानकार भन्छन्, ‘सस्तोमा किन्ने दाउ कुर्दै लगानीकर्ता’

काठमाण्डौ । साताको चौथो कारोबार दिन आज नेपाल स्टक एक्सचेञ्च(नेप्से) दोहोरो अंकले घटेको छ । आज नेप्से परिसूचक ०.५५ प्रतिशत अर्थात १४.८८ अंकले घटेर २ हजार ६८२.१५ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.६५ प्रतिशतले घटेर ४४९.९२ विन्दुमा झरेको छ । यो दिन नेप्सेमा सूचीकृत मध्ये ३११ वटा स्क्रिप्टको ९५ लाख ८३ हजार ८२९ कित्ता सेयर ५ अर्ब १४ करोड ३९ लाख रुपैयाँभन्दा बढीको कारोबार भएको  छ ।

आजको बजारबारे सेयर लगानीकर्ता संघ नेपालका कार्यवाहक अध्यक्ष तारा प्रसाद फुल्लेल भन्छन्,  ‘राजनीतिक अस्थिरता र आन्दोलनको विषयले पछिल्लो समय सेयर बजार प्रभावित भईरहेको छ । लगानीकर्ता पर्ख र हेरको अवस्थामा बसेको र सस्तोमा सेयर खरिद गर्ने मौका कुरिरहेका कारण बजारमा गिरावट आएको छ ।’

यद्यपी सरकार परिवर्तन हुने विषय अफवाह मात्रै भएको उनले दाबी गरे । उनले प्राविधिक रुपमा पनि अब बजारमा खरिद गर्ने उपयुक्त समय आएको बताए ।  

नेपाल इन्भेष्टर्स फोरमका अध्यक्ष तुलसीराम ढकालले अहिले बजार घट्नु पर्ने कुनैपनि ठोस कारण नभएको बताए । ‘नयाँ गभर्नर आउदै गर्दा २०७८ भदौ ८ गते आएको राष्ट्र बैंकका केही नीतिहरु कसरी सम्बोधन हुन्छ भनेर लगानीकर्ता व्यग्र प्रतिक्षा र आशामा रहेका छन् । ’

उनले बजारको अवस्था बलियो नै भएका कारण आम लगानीकर्तालाई बजारको गिरावटबाट हतोत्साहित नबन्न सुझाव दिए ।  

यो दिन नेप्सेमा सूचीकृत १३ वटा समूहमध्ये ३ वटा बाहेक अन्य सबैमा रातो पोतियो । आज व्यापार समूह सर्वाधिक बढ्यो । यो समूह आज ०.६० प्रतिशतले बढेर ४ हजार १५६ विन्दुमा पुग्यो ।  

यस्तै आज होटल समूह ०.१० र म्युचुअल फण्ड ०.०३ प्रतिशतले बढ्यो । फाइनान्स समूह आज सर्वाधिक अर्थात १.५३ प्रतिशतले घट्यो । बैंकिङ समूह पनि आज ०.५६ प्रतिशत, विकास बैंक ०.१३, हाईड्रो ०.६७,लगानी ०.४९,जीवन बीमा १.४८, उत्पादन तथा प्रशोधन ०.३३, लघुवित्त ०.४८, निर्जीवन  बीमा ०.५१ र अन्य समूह ०.५१ प्रतिशतले घट्यो ।  

धेरै कारोबार गर्ने कम्पनीहरु

यो दिन हिमालयन रि इन्स्योरेन्स कम्पनीको सर्वाधिक सेयर कारोबार भयो । आज यो कम्पनीको २९ करोड ६७ लाख बढीको कारोबार भयो । एनआरएन इन्फ्रास्ट्रक्चरको पनि आज २३ करोड ४६ लाख, ग्रीन डेभलपमेन्ट बैंकको १५ करोड २० लाख र हिमालयन पावर पार्टनरको १३ करोड ८३ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका कुनैपनि कम्पनीको सेयरमूल्यमा अपर सर्किट लागेन। मिथिला लघुवित्तको सेयरमूल्य आज ९.३९ प्रतिशत, भूगोल इनर्जीको ७.३५ र ग्रीन डेभलपमेन्ट बैंकको सेयरमूल्य ७ प्रतिशतले बढ्यो ।  

सामुदायिक लघुवित्तको सेयरमूल्य आज सर्वाधिक अर्थात ९.२० प्रतिशतले घट्यो । हिमालयन पावर पार्टनरको सेयरमूल्य पनि आज ४.५२,स्वेत–गंगा हाईड्रोको ४.२३ र सेन्ट्रल फाइनान्सको सेयरमूल्य ४.२० प्रतिशतले घट्यो ।