नेप्सेको गतिलो बाउन्सब्याक, सबै समूहमा हरियाली

काठमाण्डौ । साताको चौथो कारोबार दिन आज नेपाल स्टक एक्सचेञ्च (नेप्से) दोहोरो अंकले बढेको छ । आज नेप्से परिसूचक १.५१ प्रतिशत अर्थात ३९.१३ अंकले बढेर २ हजार ६२१.८६ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.३१ प्रतिशतले बढेर ४४०.६९ विन्दुमा पुगेको छ । यो दिन नेप्सेमा सूचीकृत मध्ये ३१७ वटा स्क्रिप्टको ९१ लाख ४२ हजार ९४१ कित्ता सेयर ४ अर्ब २० करोड ४४ लाख रुपैयाँभन्दा बढीको कारोबार भएको  छ ।

आज २३१ वटा स्क्रिप्टको मूल्य बढ्दा १२ वटाकोमा गिरावट आयो ।  

आजको बजारबारे बजार जानकार दामोदर गजुरेल भन्छन्,  ‘अघिल्लो दिन राजनीतिक अस्थिरताको हल्लाका बारण लगानीकर्ताले आत्तिएर सेयर बेच्दा घटेको बजार आज भने बढेको छ । प्राविधिक रुपमा पनि आज बजार सपोर्ट लेभलमा रहेका कारण आज बजारले बाउन्सब्याक गरेको छ । ’

आजको बढोत्तरीलाई बजार सम्हालिन खोजेको रुपमा लिन सकिने बताउदै उनले अहिले बजार प्रवेश गर्ने उपयुक्त समय भएको दाबी गरे ।  

नेपाल सेयरधनी संघका उपाध्यक्षका कमलराज अधिकारीले हिजो सुनियोजित रुपमा बजार घटाइएको आरोप लगाए । तर आज भने बजारले प्राकृतिक लय समातेको उनले बताए ।  

उनको विचार अब नयाँ आउने नयाँ गभर्नर बैंकिङ क्षेत्र सुधार गर्ने र पूँजीबजारमैत्री  आउने आँकलनका कारण आज बजारमा सुधार आएको हो ।    

यो दिन नेप्सेमा सूचीकृत १३ वटै समूहमा हरियाली छायो । अन्य समूह आज सर्वाधिक अर्थात २.२८ प्रतिशतले बढ्यो । बैंकिङ समूह पनि आज १.२० प्रतिशत, विकास बैंक १.२७, फाइनान्स १.८८, होटल १.८१, हाईड्रो १.८१, लगानी १.६७, जीवन बीमा २.१४, उत्पादन तथा प्रशोधन ०.९८, लघुवित्त १.४३, म्युचुअल फण्ड ०.९७,निर्जीवन बीमा १.७९ र व्यापार समूह ०.४९ प्रतिशतले बढ्यो ।  

धेरै कारोबार गर्ने कम्पनीहरु

यो दिन हिमालयन रि इन्स्योरेन्सको सर्वाधिक सेयर कारोबार भयो । आज यो कम्पनीको ४१ करोड ८६ लाख बढीको कारोबार भयो । नेपाल पुनर्बीमा कम्पनीको पनि आज ३१ करोड ६३ लाख,गार्डियन माइक्रो लाइफको २२ करोड ९८ लाख,नारायणी डेभलपमेन्ट बैंकको ११ करोड ६२ लाख र युनाइटेड मोदी हाईड्रोको १० करोड ६६ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका कुनैपनि कम्पनीको सेयरमूल्यमा अपर सर्किट लागेन । आज राप्ती हाईड्रोको सेयरमूल्य सर्वाधिक अर्थात ५.७४ प्रतिशतले बढ्यो । बुद्धभूमि नेपाल हाईड्रोको सेयरमूल्य ५.५५,आरबीबी म्यचुअल फण्डको ५.३३,युनाइ्टेड इदी मर्दीको ५.१७ र मनकामना इन्जिनियरिङको सेयरमूल्य ५.०५ प्रतिशतले बढ्यो ।  

उपकार लघुवित्तको सेयरमूल्य आज सर्वाधिक अर्थात ७.२७ प्रतिशतले घट्यो । यस्तै नारायणी डेभलपमेन्ट बैंकको सेयरमूल्य ५.११ र कर्पोरेट डेभलपमेन्ट बैंकको सेयरमूल्य १.९१ प्रतिशतले ओरालो लाग्यो ।