नेप्सेको कारोबार र सूचक दुवैमा सुधार, जानकार भन्छन्, ‘लगानीको उपयुक्त वातावरण बन्दै’

काठमाण्डौ । साताको अन्तिम कारोबार दिन आज नेपाल स्टक एक्सचेञ्च (नेप्से) झिनो अंकले बढेको छ । आज नेप्से परिसूचक ०.१२ प्रतिशत अर्थात ३.३५ अंकले बढेर २ हजार ७०३.३९ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.५७ प्रतिशतले बढेर ४५०.३३ विन्दुमा पुगेको छ । यो दिन नेप्सेमा सूचीकृत मध्ये ३२४ वटा स्क्रिप्टको १ करोड ५५ लाख २ हजार ९९८ कित्ता सेयर ७ अर्ब ८४ करोड ४६ लाख रुपैयाँभन्दा बढीको कारोबार भएको  छ ।

आज कारोबार समेत बढेको छ । अघिल्लो दिन बजारमा ५ अर्ब ४४ करोड बढीको कारोबार भएको थियो ।  

आजको बजारबारे बजार जानकार उपेन्द्र पाठक भन्छन्,  ‘बजारमा चैत मसान्तको दबाब कम हुँदै गएको छ । लगानीकर्ता नयाँ आउने गभर्नरको प्रतिक्षामा देखिन्छन् । यससँगै अब कम्पनीहरुको तेस्रो त्रैमासिक वित्तीय विवरण समेत सार्वजनिक हुँदैछ ।’

पाठकले नयाँ आउने गभर्नरले बजारमा पैसाको आपूर्ति बढाईदिए भने बजारले राम्रै गति लिने बताए । उनले अब लगानीकर्ताको तनाबको अवस्था पनि समाप्त हुने दाबी गरे ।  

अर्का बजार जानकार गोविन्द प्रसाद घिमिरेले अहिले बजारमा लगानीको सिजन भएको बताए । उनले ६–८ महिनाको अवधिका लागि कर्जा लिएरै भएपनि सेयरमा लगानी गर्नु उपयुक्त भएको दाबी गरे । ‘लगानी चक्रको हिसाबले पनि बजारमा लगानीको वातावरण बन्दै गएको छ,’उनले भने ।      

यो दिन नेप्सेमा सूचीकृत १३ वटा समूहमध्ये ३ वटा बाहेक अन्य सबैमा रातो पोतियो । आज अन्य समूह सर्वाधिक अर्थात १.२९ प्रतिशतले बढ्यो । बैंकिङ समूह आज १.१० र निर्जीवन बीमा समूह ०.६४ प्रतिशतले बढ्यो ।  

व्यापार समूह आज सर्वाधिक अर्थात १.९६ प्रतिशतले घट्यो । विकास बैंक समूह ०.२२, फाइनान्स १.५७, होटल ०.१९,लगानी ०.०५,जीवन बीमा ०.७७,उत्पादन तथा प्रशोधन ०.८७,लघुवित्त ०.३७ र म्युचुअल फण्ड ०.११ प्रतिशतले घट्यो । हाईड्रो समूह यो दिन ०.२६ अंकले खस्कियो ।  

धेरै कारोबार गर्ने कम्पनीहरु

यो दिन हिमालयन रि इन्स्योरेन्सको सर्वाधिक सेयर कारोबार भयो । आज यो कम्पनीको ७२ करोड ३२ लाख बढीको कारोबार भयो । नेपाल रि इन्स्योरेन्सको पनि आज ५५ करोड ९९ लाख, एनआरएन इन्फ्रास्ट्रक्चरको ४२ करोड ९७ लाख,हिमालयन पावर पार्टनरको ३४ करोड २ लाख र राधि विद्युतको ३२ करोड ८७ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएको एउटा मात्रै कम्पनीको सेयरमूल्यमा अपर सर्किट लाग्यो । आज ग्रीन भेन्चर्सको सेयरमूल्य ९.९९ प्रतिशतले बढ्यो । सुपर मादी हाईड्रोपावरको ६.०९,राधि विद्युतको ५.२१ र एनएलजी इ्रन्स्योरेन्सको ४.२८ प्रतिशतले बढ्यो ।  

उपकार लघुवित्तको सेयरमूल्य आज सर्वाधिक अर्थात ७.८५ प्रतिशतले घट्यो । यस्तै विन नेपाल लघुवित्तको ६.१३ र गार्डियन माइक्रो लाइफको सेयरमूल्य ६.१२ प्रतिशतले घट्यो ।