राधी जलविद्युतको सेयर ‘स्ट्रङ बुलिस’ सेन्टिमेन्टमा, कस्तो रहला आगामी यात्रा ?

काठमाण्डौ । राधी जलविद्युत कम्पनी नेपाल स्टक एक्सचेञ्ज(नेप्से)मा सूचीकृत हाईड्रो समूहको कम्पनी हो । लमजुङ्ग जिल्लामा स्थापित ४.४ मेगावटको यो कम्पनीले विभिन्न अन्य जलविद्युत कम्पनीमा पनि लगानी गरेको छ । यो कम्पनी आइएसओ ९००१ सर्टिफाइड कम्पनी हो ।  

 

 

आधारभूत पक्षः  

यस आर्थिक वर्षको दोस्रो त्रैमाससम्म कम्पनीको चुक्तापूँजी १ अर्व ७५ करोड ५५ लाख रुपैयाँबराबर रहेको छ । त्यसैगरि कम्पनीको जगेडा कोषमा ४० करोड ८० लाख रुपैयाँ रहेको छ । कम्पनीको कुल पूँजी २ अर्ब १६ करोड रुपैयाँ रहेको छ ।  

साथै,कम्पनीको खुद मुनाफा ६ करोड ३४ लाख रुपैयाँ रहेको छ भने प्रतिसेयर आम्दानी ७.२२ रुपैयाँ , बुक भ्यालु १२३ रुपैयाँ र रिर्टन अन इक्विटी ५.८६ प्रतिशत रहेको छ ।  

प्राविधिक पक्ष  

इलिअट वेभ

इलिअट वेभमा विभिन्न डिग्रीहरु हुने गर्छन् । त्यस्ता डिग्रीहरुले सानाठूला गरेर एकदिनदेखि एकसय वर्षसम्मको समय अवधिलाई प्रतिनिधित्व गर्छन् । इलिअट वेभमा मूल्य माथि जान पाँच फरक–फरक वेभ हुन्छन् भने तल जान ३ वेभ हुन्छन् ।  

माथि लाग्ने पाँच वेभमा पनि तीनवटा बढोत्तरीका र २ वटा सुधारका देख्न सकिन्छ । यसमा १, ३, ५ बढोत्तरीको हुन्छ भने २ र ४ मा करेक्सनको हुन्छ । वेभ ५ को करेक्सन वेभ ‘ए’ हो । वेभ ‘ए’, ‘बी’, ‘सी’ले मूल्य तथा सूचक तल जाने संकेत दिन्छ ।

यस आधारमा यो कम्पनी हाल ईलिअट वेभको पाँचौ वेभमा चल्दै गरेको देखिन्छ । जसअनुसार कम्पनीको सेयर प्रतिकित्ता ४८० रुपैयाँसम्म पुग्न पनि सक्छ ।  

फियर एण्ड ग्रिड इन्डेक्स

फियर एण्ड ग्रिड इन्डेक्समा यो कम्पनी ८० को तहमा स्ट्रङ बुलिस सेन्टिमेन्टमा चलेको देखिन्छ । यो भनेको कम्पनीको सेयरमा अधिक खरिद–बिक्री भएको छ भन्ने हो ।  कम्पनीको ५२ साताको उच्च मुल्य प्रतिकित्ता ४६३ रुपैयाँ र न्यून मूल्य २२६ रुपैयाँ रहेको छ । कम्पनीको शतप्रतिशत सेयर सर्वसाधारणमा परिणत भएको छ । कम्पनीको ६ वर्षको वार्षिक औषत लाभांशदर १२ प्रतिशत रहेको छ ।  

बोलिङ्गर ब्याण्ड

बोलिङ्गर ब्याण्डको आधारमा यो कम्पनीको सेयर मुल्य हाल अपर ब्याण्डमा चलेको छ । आज अपर ब्याण्डमा शुटिङ स्टार बनेको देखिन्छ । यस कारण आगामी दिनमा कम्पनीको सेयर मूल्यमा सम्भावित रुपमा करेक्सन आउन पनि सक्छ । म्याक्डीमा बुलिस क्रसओभर भ्यालिड नै रहेको छ । आरएसआई भने ओभर बट जोन ७३ को तहमा चलेको देखिन्छ । यसकारण विभिन्न इन्डिकेटरबाट नियाल्दा यस कम्पनीको सेयरमा अल्पकालिन करेक्सनको सम्भावना रहन्छ ।

पिभट् प्वइन्टः  

पिभट् विश्लेषणमार्फत सेयर तथा डेरिभेटिभको  अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।  

बढेमा प्रतिरोध  

प्रतिरोध ३ – ४७८

प्रतिरोध २ – ४५४

प्रतिरोध १–  ४२२

पिभट प्वइन्टः ३९७

घटेमा सपोर्ट  

सपोर्ट १– ३६५

सपोर्ट २– ३४१

सपोर्ट  ३ –३०९

निष्कर्षः आधारभूत रुपमा यो कम्पनीको अवस्था सन्तोषजनक नै देखिन्छ । अघिल्लो आर्थिक वर्षको यहि अवधिको तुलनामा कम्पनीको प्रतिसेयर आम्दानी, खुद मुनाफा र रिर्टन अन इक्विटी घटेको छ । कम्पनीको चूक्तापूँजी बढ्दै जाँदा रिर्टन अन इक्विटीमा खासै सुधार आएको छैन । प्राविधिक  रुपमा यो कम्पनी सेयर भाउले एकदेखि पाँचवटा वेभ बनाएर चलेको देखिन्छ । जसअन्तर्गत कम्पनीको सेयर भाउ करिब प्रतिकित्ता ४८० रुपैयाँसम्म पुग्न पनि सक्छ । आज बनाएको क्याण्डलको आधारमा नियाल्दा यस कम्पनीको सेयर मूल्यले अल्पकालिन करेक्सन लिन सक्ने सम्भावना पनि रहन्छ ।  

नोटः सेयर बजारमा लगानी जोखिमपूर्ण हुन्छ । यो विश्लेषण कारोबारका लागि सिफारिस भने होइन ।