नेप्सेको गिरावट आजपनि जारी, जानकार भन्छन्, ‘गभर्नर नियुक्त हुन नसक्दा सेयरबजार उभो लाग्न सकेन’

काठमाण्डौ । नेपाल स्टक एक्सचेञ्ज(नेप्से)को गिरावट आजपनि जारी रहेको छ । साताको चौथो कारोबार दिन आज नेप्सेमा सामान्य अंकको गिरावट आएको छ । आज नेप्से परिसूचक ०.३० प्रतिशत अर्थात ८.१४ अंकले घटेर २ हजार ६२३.८३ विन्दुमा झरेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.३४ प्रतिशतले घटेर ४४२ विन्दुमा सीमित बनेको छ । यो दिन नेप्सेमा सूचीकृत मध्ये ३१४ वटा स्क्रिप्टको २ करोड ४६ लाख ४१ हजार २६१ कित्ता सेयर ९ अर्ब ३७ करोड ४१ लाख रुपैयाँभन्दा बढीको कारोबार भएको  छ ।

आजको बजारबारे नेपाल इन्भेष्टर्स फोरमका अध्यक्ष तुलसीराम ढकाल भन्छन्,  ‘सरकारले गभर्नर नियुक्ति गर्न नसक्दा नै सेयर बजार घटिरहेको छ । यो भनेको देशको अर्थतन्त्र र पूँजी बजारलाई सरकारले गरेको उपेक्षा हो । यही कारण लगानीकर्ताको मनोबल बढ्न सकेको छैन । धितोपत्र बोर्डले पनि लगानीकर्ताको अपेक्षाबमोजिम काम गर्न सकेको देखिदैछ ।’

यद्यपी सरकारको नीति तथा कार्यक्रम र बजेट पनि आउदै गर्दा बजार धेरै घट्ने ठाउ भने नरहेको उनले बताए । उनले अहिले लगानीकर्ता पर्ख र हेरको अवस्थामा रहेको समेत बताए ।  

अर्का बजार जानकार विरेन्द्र विष्टको विचारमा पनि राजनीतिक विषय र शैक्षिक आन्दोलनले गर्दा बजारले गति लिन नसकेको हो । अहिले घटेको समयमा बजारमा एक्युमुलेशन चलिरहेको र बजेटपछि भने बजार ३ हजार विन्दुमाथि पुग्ने उनले दाबी गरे ।    

यो दिन नेप्सेमा सूचीकृत १३ वटा समूहमध्ये ४ वटा समूहमा हरियाली छायो भने अन्य ८ वटा समूहमा रातो पोतियो । हाईड्रो समूह आज सर्वाधिक अर्थात ०.६१ प्रतिशतले बढ्यो । लघुवित्त समूह पनि आज ०.०४ म्युचुअल फण्ड ०.२३ र व्यापार समूह ०.४० प्रतिशतले बढ्यो ।  

अन्य समूह आज सबैभन्दा बढीले घट्यो । यो समूह आज १.१६ प्रतिशतले ओरालो लाग्यो । बैंकिङ समूह पनि आज ०.६४ प्रतिशत, विकास बैंक ०.९०,जीवन बीमा ०.०७ ,फाइनान्स १.१४,होटल ०.३१,लगानी ०.१३,उत्पादन तथा प्रशोधन ०.६५ र निर्जीवन बीमा समूह ०.१२ प्रतिशतले घट्यो ।  

धेरै कारोबार गर्ने कम्पनीहरु

यो दिन राधी विद्युतको सर्वाधिक सेयर कारोबार भयो । आज यो कम्पनीको ५८ करोड ४ लाख बढीको कारोबार भयो । नाङी ग्रुप पावरको सेयरमूल्य पनि आज ५२ करोड ९९ लाख, सानिमा माई हाईड्रोको ५० करोड ९४ लाख र अरुण भ्याली हाईड्रोको सेयरमूल्य ४२ करोड ३० लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ३ वटा कम्पनीको सेयरमूल्यमा अपर सर्किट लाग्यो । आज समाज लघुवित्त, नेपाल माइक्रो इन्स्योरेन्स र क्रेष्ट माइक्रो इन्स्योरेन्सको सेयरमूल्यमा मात्रै अपर सर्किट लाग्यो ।  

यस्तै आज सिनर्जी पावर कम्पनीको सेयरमूल्य ८.३७ र रिडी पावर कम्पनीको सेयरमूल्य ७.३६ प्रतिशतले बढ्यो ।  

भूगोल इनर्जीको सेयरमूल्य आज सर्वाधिक घट्यो । यो कम्पनीको सेयरमूल्य आज १० प्रतिशतले घट्यो । सप्तकोशी डेभलपमेन्ट बैंकको सेयरमूल्य पनि आज ५.५७ र मायो खोला हाईड्रोको सेयरमूल्य ३.८६ प्रतिशतले घट्यो ।