लगातार ३ दिन घट्यो नेप्से, कारोबारमा भने बढोत्तरी

काठमाण्डौ । साताको अन्तिम कारोबार दिन आज पनि नेपाल स्टक एक्सचेञ्च (नेप्से) मा सामान्य अंकको गिरावट आएको छ । आज नेप्से परिसूचक ०.२२ प्रतिशत अर्थात ५.९९ अंकले घटेर २ हजार ६४०.९६ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स भने ०.०२ प्रतिशतले बढेर ४५१.४३ विन्दुमा पुगेको छ । यो दिन नेप्सेमा सूचीकृत मध्ये ३११ वटा स्क्रिप्टको १ करोड ७१ लाख ८ हजार ८०९ कित्ता सेयर ७ अर्ब ९७ करोड ८ लाख रुपैयाँभन्दा बढीको कारोबार भएको  छ ।

अघिल्लो दिन भने ५ अर्ब १६ करोड रुपैयाँबराबरको सेयर कारोबार भएको थियो ।  

आजको बजारबारे बजार जानकार उपेन्द्र पाठक भन्छन्,  ‘अहिले बजारले बाफियाको विषयका कारण गति लिन नसकेको हो । यो पुरानै विषय हो र यो छलफलकै चरणमा छ । त्यसैले यही कारणले बजार तरंगित हुन आवश्यक छैन ।’

आजको कारोबार हेदौ बजारमा फेरि कारोबारी हाबी भएको हुनसक्ने उनले बताए ।  

यस्तै अर्का बजार जानकार सुवासचन्द्र ढुङगाना भन्छन्,‘अहिले बजार सपोर्टको जोनमा नै छ र बजार सम्हालिने प्रयास गर्दैछ । जुन, जुलाई र अगस्ट महिनामा सिजिनल रुपमा बजार चल्ने भएकाले बाफियाको विषयले बजारलाई प्रभाव नपार्ने देखिन्छ ।’

उनले असार अघि बजारमा एउटा स्विङको सम्भावना समेत औल्याए ।  

यो दिन नेप्सेमा सूचीकृत १३ वटा समूहमध्ये २ वटा बाहेक अन्य सबैमा रातो पोतियो। आज हाईड्रो समूह र लगानी समूह क्रमशः १.२४ र ०.०१ प्रतिशतले बढ्यो ।  

व्यापार समूह आज सर्वाधिक अर्थात १.५३ प्रतिशतले घट्यो । बैंकिङ समूह पनि आज ०.३६ प्रतिशत, विकास बैंक ०.२०, फाइनान्स ०.२६, होटल ०.३४, जीवन बीमा ०.५८, उत्पादन तथा प्रशोधन १.०९, लघुवित्त ०.३३, म्युचुअल फण्ड ०.२३, निर्जीवन बीमा ०.२३ र अन्य समूह ०.४६ प्रतिशतले घट्यो ।  

धेरै कारोबार गर्ने कम्पनीहरु

यो दिन राधी विद्युत कम्पनीको सर्वाधिक सेयर कारोबार भयो । आज यो कम्पनीको ९१ करोड २३ लाख बढीको सेयर कारोबार भयो । युनिभर्सल पावरको पनि आज ६४ करोड ३७ लाख, बुटवल पावरको ४९ करोड ५५ लाख, ङादी्र ग्रुप पावरको ४३ करोड ३५ लाख र अरुण काबेली पावरको २९ करोड ३ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ५ वटा कम्पनीको सेयरमूल्यमा अपर सर्किट लाग्यो । आज रिभर फल्स पावर,बुटवल पावर, पियोर इनर्जी,बरुण हाईड्रोपावर र सप्तकोशी डेभलपमेन्ट बैंकको सेयरमूल्यमा अपर सर्किट लाग्यो ।  

यो दिन राधी विद्युतको सेयरमूल्य ७.५६ प्रतिशत,एशियन हाईड्रोपावर र उपकार लघुवित्तको सेयरमूल्य ६.५४ प्रतिशतले बढ्यो ।  

ओम मेगाश्री फर्मास्युटिकल्सको आज सर्वाधिक अर्थात ९.३० प्रतिशतले घट्यो । ग्रिन डेभलपमेन्ट बैंकको सेयरमूल्य पनि आज ३.९० प्रतिशत र सुपर माई हाईड्रोको सेयरमूल्य ३.५५ प्रतिशतले घट्यो ।