नेप्सेमा गिरावटका साथ साताको सुरुवात, हाईड्रो र होटल समूह मात्रै बढे

काठमाण्डौ । साताको पहिलो कारोबार दिन आज पनि नेपाल स्टक एक्सचेञ्च (नेप्से) सामान्य अंकले घटेको छ । आज नेप्से परिसूचक ०.४१ प्रतिशत अर्थात ११.०६ अंकले घटेर २ हजार ६२९.८९ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.४५ प्रतिशतले घटेर ४४९.२७ विन्दुमा झरेको छ । यो दिन नेप्सेमा सूचीकृत मध्ये ३१३ वटा स्क्रिप्टको १ करोड ९९ लाख ९२ हजार १८१ कित्ता सेयर ९ अर्ब १३ करोड ७४ लाख रुपैयाँभन्दा बढीको कारोबार भएको  छ ।

आजको बजारबारे सेयर लगानीकर्ता संघ नेपालका कार्यवाहक अध्यक्ष तारा प्रसाद फुल्लेल भन्छन्,  ‘ लगानीकर्तामा आत्मविश्वासको कमीका कारण पछिल्लो समय बजार बढ्न सकिरहेको छैन । धेरैजसो लगानीकर्ताले अल्पकालका लागि लगानी गरे जस्तो देखिन्छ । सरकारले पनि एनआरएन भित्राउने र पूँजी बजारको विकास गर्ने जस्ता विषयहरु कार्यक्रममा मात्रै सीमित राख्दा बजारमा रौनक देखिदैन ।’

यसकारण समीक्षामार्फत माइक्रो फाइनान्स लगायत कर्जाका क्याप हटाउन आवश्यक भएको उनले बताए । ‘अहिले गभर्नर अर्थमन्त्री दुवै जना सकारात्मक छन् । त्यसैले ढिलोचाडो बजारले पुनः गति लिनेमा ढ्क्क हुन सकिन्छ’ उनले भने ।  

अर्का बजार जानकार टेकेन्द्र थपलियाले लामो समयदेखि नयाँ लगानीकर्ता र लगानी नआउनु, चौथो त्रैमासको अन्त्य नजिकिनु जस्ता विषयले बजारले गति लिन नसकेका बताए ।  

यद्यपी आज हाईड्रो सेक्टरमा चमक आउनु भने सकारात्मक विषय भएको उनले बताए ।    

यो दिन नेप्सेमा सूचीकृत १३ वटा समूहमध्ये २ वटा बाहेक अन्य सबैमा रातो पोतियो। आज हाईड्रो समूह १.२२ प्रतिशत र होटल र समूह ०.१२ प्रतिशतले बढ्यो ।  

बैंकिङ समूहमा आज सर्वाधिक गिरावट आयो । यो समूह आज १.०५  प्रतिशतले घट्यो । विकास बैंक समूह ०.०६, फाइनान्स ०.९१, लगानी ०.०८, जीवन बीमा ०.७७, उत्पादन तथा प्रशोधन ०.७४, लघुवित्त ०.७०, म्युचुअल फण्ड ०.१०,निर्जीवन बीमा ०.९५, व्यापार ०.२३ र अन्य समूह ०.८८ प्रतिशतले घट्यो ।  

धेरै कारोबार गर्ने कम्पनीहरु

यो दिन राधी विद्युतको सर्वाधिक सेयर कारोबार भयो । आज यो कम्पनीको ७२ करोड ९५ लाख बढीको सेयर कारोबार भयो । यस्तै युनिभर्सल पावरको ६२ करोड २७ लाख, ङादी ग्रुप पावरको ६१ करोड ७१ लाख, बुटवल पावरको ४४ करोड ५१ लाख र सानिमा माई हाईड्रोको ४४ करोड ८९ हजार बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा अपर सर्किट लाग्यो । आज रिभर फल्स पावर र पियोर इनर्जीको सेयरमूल्यमा मात्रै अपर सर्किट लाग्यो ।  

यो दिन छ्याङदी हाईड्रोपावरको सेयरमूल्य ८.५७ प्रतिशत, हिमालयन पावर पाटर्नरको ८.०३ र चिलिमे हाईड्रोपावरको सेयरमूल्य ७.७९ प्रतिशतले बढ्यो ।  

ओम मेगाश्री फर्मास्युटिकल्सको सेयरमूल्य आज सर्वाधिक अर्थात १० प्रतिशतले घट्यो । नेपाल माइक्रो इन्स्योरेन्सको सेयरमूल्य पनि आज ८.२८ प्रतिशत, समाज लघुवित्तको ८.२८ र क्रेष्ट माइक्रो लाइफको सेयरमूल्य ७.७३ प्रतिशतले ओरालो लाग्यो ।