नेप्सेमा झिनो गिरावट, कारोबार पौने ६ अर्बमा सीमित

काठमाण्डौ । साताको तेस्रो कारोबार दिन आज नेपाल स्टक एक्सचेञ्च (नेप्से) झिनो अंकले घटेको छ । आज नेप्से ०.२२ अंकले घटेर २ हजार ६०१.८४ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स भने ०.०२ प्रतिशतले बढेर ४४५.१७ विन्दुमा पुगेको छ । यो दिन नेप्सेमा सूचीकृत मध्ये ३१६ वटा स्क्रिप्टको १ करोड ३८ लाख १८ हजार ५५९ कित्ता सेयर ५ अर्ब ७६ करोड ७८ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार अजयसिंह थापा(जयशम्भु) भन्छन्,  ‘विगत एक वर्षदेखि बजारमा नयाँ पैसा र लगानीकर्ता नआएका कारण बजार साइडवेजमा चलिरहेको छ । बजार यो बीचमा २५५० देखि २७६० विन्दुको बीचमा साइडवेज चलेको देखिन्छ ।’

उनले संस्थापक सेयरधनीहरुले बजारबाट पैसा झिकिरहेको र नयाँ पैसा पनि नआउदा बजारले गति लिन नसकेको बताए । यद्यपी बजारमा २–४ सय अंकको स्विङ भने बजारमा आउने सक्ने विश्वास उनले व्यक्त गरे ।  

Sponsored

Sponsored

नेपाल इन्भेष्टर्स फोरमका उपाध्यक्ष राजन लम्सालले हिजोआज सेयर खरिद गर्नेहरु पछि हट्दा बजारमा दबाब परेको बताए । यस्तै उनले बजारमा असारको क्लोजिङको प्रभाव समेत परेको हुन सक्ने बताए ।  

यो दिन नेप्सेमा सूचीकृत १३ वटा समूहमध्ये ५ वटा समूहमा हरियाली छायो भने अन्य ८ वटा समूहमा रातो पोतियो । बैंकिङ समूह आज सर्वाधिक अर्थात ०.५४ प्रतिशतले बढ्यो । लगानी समूह पनि आज ०.३५ प्रतिशत, उत्पादन तथा प्रशोधन ०.३७, लघुवित्त ०.१९ र म्युचुअल फण्ड समूह ०.३९ प्रतिशतले बढ्यो ।  

होटल समूहमा आज सर्वाधिक गिरावट आयो । यो समूह आज १.०६ प्रतिशतले घट्यो । विकास बैंक समूह पनि आज ०.३२ प्रतिशत,फाइनान्स ०.६२,होटल १.०६, हाईड्रो ०.३४, जीवन बीमा ०.०४, निर्जीवन बीमा ०.२२ र अन्य समूह ०.२० प्रतिशतले घट्यो ।  

धेरै कारोबार गर्ने कम्पनीहरु

यो दिन बुटवल पावर कम्पनीको सर्वाधिक सेयर कारोबार भयो । यो कम्पनीको आज २७ करोड ६५ लाख बढीको सेयर कारोबार भयो । राधी विद्युतको पनि आज २३ करोड ९६ लाख, हिमालयन पावर पार्टनरको २३ करोड ८५ लाख, एनआरएन इन्फ्रास्ट्रक्चरको २३ करोड र ङादी ग्रुप पावरको २१ करोड ४५ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका कुनै पनि कम्पनीको सेयरमूल्यमा अपर सर्किट लागेन । ओम मेगाश्री फर्मास्युटिकल्सको सेयरमूल्य आज सर्वाधिक अर्थात ८.०१ प्रतिशतले बढ्यो । हिमालयन पावर पार्टनरको सेयरमूल्य पनि आज ७.८७, खानीखोला हाईड्रोको ५.९७, पियोर इनर्जीको ५.८४ र पाँचथर पावरको सेयरमूल्य ४.८३ प्रतिशतले बढ्यो ।  

दोर्दी खोला जलविद्युत आज सर्वाधिक गुमाउने कम्पनीको रुपमा रह्यो । यो कम्पनीका लगानीकर्ताले आज ४.३२ प्रतिशतले गुमाए । यस्तै थ्रिस्टार हाईड्रोका लगानीकर्ताले ३.१२ प्रतिशत र बरुण हाईड्रोका लगानीकर्ताले ३.११ प्रतिशतले गुमाए ।