नेप्सेमा उच्च गिरावट, ३ हजार विन्दुबाट तल झर्यो बजार

काठमाण्डौ । साताको चौथो कारोबार दिन आज नेपाल स्टक एक्सचेञ्च (नेप्से) मा उच्च अंकको गिरावट आएको छ । आज नेप्से परिसूचक १.५९ प्रतिशत अर्थात ४७.९३ अंकले घटेर २ हजार ९५४.१४ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि २.०७ प्रतिशतले घटेर ५०७.८४ विन्दुमा झरेको छ । यो दिन नेप्सेमा सूचीकृत मध्ये ३२७ वटा स्क्रिप्टको ३ करोड ६४ लाख १७ हजार ७४२ कित्ता सेयर १६ अर्ब ४४ करोड १३ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार विरेन्द्र विष्ट भन्छन्,  ‘केही दिनदेखि बढेको बजारमा आज तीव्र नाफा बुक भएको हो । आईजिनको विषयले पनि लगानीकर्ता त्रसित भएका कारण आज बजारमा दबाब देखिएको छ ।’

उनले आइतबारबाट भने बजारमा सुधार आउने अपेक्षा व्यक्त गरे । यद्यपी बजारलाई राम्रै साथ दिईरहेको र १२÷१५ अर्बको कारोबार हुनु सकारात्मक नै भएको उनको भनाई छ ।  

अर्का बजार जानकार टेकेन्द्र थपलियाले आज बजारमा नाफा बुक भएकै कारण परिसूचक घटेको बताए । ‘आइतबार साढे २६ अर्ब कारोबार भएको र आज त्यही सेयरको बिक्री दबाब आउदा बजार घट्न पुगेको हो । केही दिनपछि भने बजार पुनः सम्हालिन्छ,’ उनले भने ।  

यो दिन नेप्सेमा सूचीकृत १३ वटा समूहमध्ये २ वटा बाहेक अन्य सबैमा रातो पोतियो । आज म्युचुअल फण्ड र अन्य समूह मात्रै बढे । यी समूहहरु आज ०.०४ र ०.५६ प्रतिशतले बढे ।  

लघुवित्त समूहमा आज सर्वाधिक गिरावट आयो । यो समूह आज ३.६४ प्रतिशतले घट्यो । बैंकिङ समूह पनि आज १.६३ प्रतिशत, विकास बैंक ३.३४, फाइनान्स २.८७, होटल २.२७, हाईड्रो १.७९, लगानी १.६७, जीवन बीमा १.७७, उत्पादन तथा प्रशोधन १.३२, निर्जीवन बीमा १.७४ र व्यापार समूह २.४५ प्रतिशतले घट्यो ।  

धेरै कारोबार गर्ने कम्पनीहरु

यो दिन हिमालयन रि इन्स्योरेन्सको सर्वाधिक सेयर कारोबार भयो । आज यो कम्पनीको १ अर्ब ३२ करोड बढीको सेयर कारोबार भयो ।  

यस्तै हिमालयन डिष्टिलरीको ७३ करोड २९ लाख, शिवम् सिमेन्टको ५७ करोड ३३ लाख,ग्रीन भेन्चर्सको ५६ करोड ६९ लाख र नेपाल पुनर्बीमाको ५४ करोड ३५ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा मात्रै अपर सर्किट लाग्यो । आज सान्भी इनर्जी र ट्रेड टावरको सेयरमूल्यमा अपर सर्किट लाग्यो ।  

समता घरेलु लघुवित्तको सेयरमूल्य पनि आज ६.७४ प्रतिशत, सिक्लेस हाईड्रोको ५.१६ र भूगोल इनर्जीको सेयरमूल्य ३.८२ प्रतिशतले बढ्यो ।  

ग्रीन डेभलपमेन्ट बैंकको सेयरमूल्य आज सर्वाधिक अर्थात ८.०४ प्रतिशतले घट्यो । यो दिन कालिका पावरको सेयरमूल्य पनि ६.०१ प्रतिशत,सीवाईसी नेपाल लघुवित्तको ५.४२ र नाडेप लघुवित्तको सेयरमूल्य ५.४२ प्रतिशतले घट्यो ।