१५.८४ रुपैयाँले धनात्मक बन्यो नेरुडे मिर्मिरे लघुवित्तको ईपीएस, ५.५३ करोड खुद नाफा आर्जन

काठमाण्डौ । अघिल्लो आवमा ऋणात्मक रहेको नेरुडे मिर्मिरे लघुवित्त वित्तीय संस्था लिमिटेडको प्रतिसेयर आम्दानी(ईपीएस) धनात्मक बनेको छ । चालु आवको पहिलो त्रैमासमा संस्था  नाफामा गएसँगै ईपीएस १५.८४ रुपैयाँले धनात्मक बनेको हो ।  

अघिल्लो आवको सोही अवधिसम्म भने संस्थाको ईपीएस ७४.७३ रुपैयाँले ऋणात्मक अवस्थामा थियो । संस्थाले पहिलो त्रैमाससम्म ५ करोड ५३ लाख रुपैयाँ खुद नाफा आर्जन गरेको छ । अघिल्लो आवको सोही अवधिमा भने संस्था २६ करोड ११ लाख रुपैयाँ खुद घाटामा थियो ।  

संस्थाको खुद ब्याज आम्दानी भने वृद्धि भएको छ । खुद ब्याज आम्दानी ६४.८२ प्रतिशतले बढ्दै ४० करोड ३३ लाख रुपैयाँ पुगेको छ । संस्थाको खुद शुल्क तथा कमिशन आम्दानी पनि २ करोड ९२ लाखबाट बढेर ३ करोड ७६ लाख पुगेको छ । संस्थाको खुद सञ्चालन आम्दानी ३५ करोड २६ लाख र सञ्चालन मुनाफा ७ करोड ६० लाख रुपैयाँ रहेको छ ।  

यो अवधिमा संस्थाको कुल सञ्चालन खर्च ह्वात्तै बढेको छ । संस्थाको इम्पेयरमेन्ट चार्ज ८ करोड ८३ लाख रुपैयाँले रिभर्सल भएको छ । खराब कर्जा अनुपात १६.१४ प्रतिशतबाट घटेर १५.७० प्रतिशतमा सीमित बनेको छ ।  

पहिलो त्रैमाससम्म संस्थाको वितरणयोग्य मुनाफा ७ करोड ९१ लाख रुपैयाँ र वार्षिक वितरणयोग्य प्रतिसेयर आम्दानी ५.६६ रुपैयाँ रहेको छ ।    

यो अवधिसम्म संस्थाको निक्षेप संकलन घटेको छ । अघिल्लो आवसम्म ६ अर्ब ४५ करोड निक्षेप संकलन गरेको संस्थाले समीक्षा अवधिसम्म भने ६ अर्ब ४४ करोड रुपैयाँबराबरको निक्षेप संकलन गर्न सफल भएको छ ।  

संस्थाको कर्जा प्रवाह पनि घटेको छ । संस्थाले १९ अर्ब ८७ करोड रुपैयाँबराबरको कर्जा प्रवाह गरेको छ । अघिल्लो आवको पहिलो त्रैमाससम्म संस्थाले २० अर्ब १३ करोड रुपैयाँबराबरको कर्जा प्रवाह गरेको थियो । रिटेन्ड अर्निङ ७ करोड ९१ लाख रुपैयाँ रहेको संस्थाको रिजर्भ कोषमा १ अर्ब ४७ करोड सञ्चित छ ।    

समीक्षा अवधिसम्म संस्थाको प्रतिसेयर आम्दानी(ईपीएस)१५.८४ रुपैयाँ, प्रतिसेयर नेटवर्थ २११.२१ रुपैयाँ,मूल्य आम्दानी अनुपात ३८.०९ गुणा ,प्रतिसेयर कुल सम्पत्तिको मूल्य १ हजार ५२१.५९ रुपैयाँ र तरलता अनुपात ९.३१ प्रतिशत कायम भएको छ ।