सामान्य अंकले घट्यो सेयरबजार, जानकार भन्छन्, ‘आईपीओले बजार बिगार्दै छ’

काठमाण्डौ । साताको दोस्रो कारोबार दिन आज सेयरबजार सामान्य अंकले घटेको छ । आज नेपाल स्टक एक्सचेञ्च(नेप्से) परिसूचक ०.११ प्रतिशत अर्थात ३.०२ अंकले घटेर २ हजार ६०६.६७ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.३३ प्रतिशतले घटेर ४४६.७५ विन्दुमा सीमित बनेको छ । यो दिन नेप्सेमा सूचीकृत मध्ये ३३१ वटा स्क्रिप्टको १ करोड १ लाख ४६ हजार ४०० कित्ता सेयर ४ अर्ब ६६ करोड ९५ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार प्रकाश रजौरे भन्छन्, ‘पछिल्लो समय लगानीकर्ताहरुमा नियामक निकाय नेपाल धितोपत्र बोर्डको गैरजिम्मेवारीपनका कारण नै मनोबल बढ्न सकिरहेको छैन । बोर्डले बजारलाई नियमन गर्नमा आफ्नो भूमिका सशक्त बनाउन सकिरहेको छैन । अहिले बजारमा होल्डिङ गर्ने खालका लगानीकर्ताहरु आएका नै छैनन् । जति पनि कारोबार भइरहेको छ, त्यो सबै ट्रेडरहरुले गरेको हो ।’

उनले थपे, ‘अहिलेको समयमा आइपीओले बजार बिगारिरहेको छ । जति पनि कम्पनीहरुको आइपीओ धमाधम आइरहेको छ ती कम्पनीहरुको अधिकांशको ब्यालेन्स्ड सिट राम्रो देखिदैन । त्यसैमाथि अहिले प्रिमियम र बुकबिल्डिङमार्फत आइपीओ निकाल्न लागेका कम्पनीले झनै बजार तल झार्ने सम्भावना देखिन्छ । यो विषयमा बोर्डले ध्यान दिन जरुरी छ । साथै केही हदसम्म चुनावी माहोलले पनि बजारलाई प्रभाव पारिरहेको छ । यदि समयमै चुनाव हुने हो भने लगानीकर्तामा मनोबल बढेर लगानी गर्न प्रवेश गर्न बजार प्रवेश गर्न सक्छन् । तत्कालको लागि बजार केही समयसम्म साइडवेजमै चल्ने देखिन्छ । बजारले २७ सय देखि ३ हजारको विन्दु टेक्यो भने मात्रै एउटा सपोर्ट जोन बनाउन सक्छ ।’

यो दिन नेप्सेमा सूचीकृत १३ वटा समूह मध्ये ५ वटामा हरियाली छायो भने ८ वटामा रातो पोतियो । आज उत्पादन तथा प्रशोधन समूह सर्वाधिक अर्थात ०.६१ प्रतिशतले बढ्यो । यस्तै हाईड्रो समूह ०.१२, जीवन बीमा ०.५०, निर्जीवन बीमा ०.०५ र व्यापार ०.४१ प्रतिशतले  बढ्यो ।

बैंकिङ समूह आज सर्वाधिक अर्थात ०.६७ प्रतिशतले घट्यो । विकास बैंक समूह पनि आज ०.११ प्रतिशत, फाइनान्स ०.५७, होटल ०.२३, लगानी ०.१६, लघुवित्त ०.२९, म्युचुअल फण्ड ०.०४ र अन्य ०.२१ प्रतिशतले घट्यो ।  

धेरै कारोबार गर्ने कम्पनीहरु

आज ङादी ग्रुप पावरको सर्वाधिक सेयर कारोबार भयो । आज यो कम्पनीको ५५ करोड ८६ लाख बढीको सेयर कारोबार भयो ।

यस्तै सागर डिस्टिलरीको २३ करोड ९७ लाख , पियोर इनर्जीको ९ करोड ७६ लाख,राधी विद्युतको ९ करोड ९ लाख र झापा इनर्जीको ८ करोड ६२ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा अपर सर्किट लाग्यो । आज अपर स्याङ्गे हाईड्रोपावर, स्वस्तिक लघुवित्त, झापा इनर्जी र श्रीनगर एग्रोटेकको सेयरमूल्यमा अपर सर्किट लाग्यो ।  

यस्तै इङ्ग्वा हाईड्रोपावरको सेयरमूल्य ९.०३, पियोर इनर्जीको ४.४०, मकर जितुमाया सुरीको सेयरमूल्य ४.१९ प्रतिशतले बढ्यो ।  

यो दिन सपोर्ट माईक्रोफाइनान्सको सेयरमूल्य सर्वाधिक अर्थात ५.१६ प्रतिशतले घट्यो । मेन्छियाम हाईड्रोको सेयरमूल्य पनि आज ३.७३ र गृह्वेश्वरी मर्चेन्टको सेयरमूल्य ३.६८ प्रतिशतले घट्यो ।