टिकेन सेयरबजारको बढोत्तरी, जानकार भन्छन्, ‘स्मार्ट मनि नआउँदा बजारले लय गुमायो’

काठमाण्डौ । साताको चौथो कारोबार दिन आज सेयरबजार सामान्य अंकले घटेको छ । आज नेपाल स्टक एक्सचेञ्च(नेप्से) परिसूचक ०.३० प्रतिशत अर्थात ७.८६ अंकले घटेर २ हजार ६०६.२० विन्दुमा पुगेको छ ।

अघिल्लो दिन भने नेप्से परिसूचक ०.२८ प्रतिशत अर्थात ७.३९ अंकले बढेको थियो ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.१९ प्रतिशतले घटेर ४४६.१८ विन्दुमा पुगेको छ । यो दिन नेप्सेमा सूचीकृत मध्ये ३२९ वटा स्क्रिप्टको ८६ लाख ४७ हजार ९४८ कित्ता सेयर ३ अर्ब ७३ करोड ८७ लाख रुपैयाँभन्दा बढीको कारोबार भएको  छ । अघिल्लो दिन भने ३ अर्ब ७५ करोड रुपैयाँभन्दा बढीको कारोबार भएको थियो ।

आजको बजारबारे बजार जानकार कविराज तिमल्सिना भन्छन्, ‘सेयरबजारका लागि यो सिजन भनेको अफ सिजन हो, यो कुरा लगानीकर्ताहरुले बुझ्नु जरुरी छ । साथै, अहिलेको बजारले विशेषगरी स्थिर राजनीति खोजिरहेको छ, समयमै चुनाव खोजिरहेको छ । राजनीतिक अन्योलताका कारण अहिले बजारमा ठूला लगानीकर्ताहरु प्रवेश गर्न सकिरहेका छैनन र लगानी गर्न तयार पनि छैनन् ।’

उनले थपे, ‘घट्दो बजारमा कारोबार रकम थोरै छ भने सप्लाई कम भएको बुझ्नुपर्दछ । आजको बजारमा सप्लाई कम भएको देखिन्छ । ठूला लगानीकर्ता बजार प्रवेश नगर्दा र बाजरमा स्मार्ट मनि छिर्न नसक्दा बजारले लय लिन सकिरहेको छैन । अहिलेको कारोबार भनेको ट्रेडरहरुले सेयर खरिदबिक्री गरेको मात्रै कारोबार हो । यदि राजनीतिक परिवेश राम्रो हुँदै गएमा र समयमै चुनाव हुने हो भने बजारमा ठूला लगानीकर्ताहरु प्रवेश गर्छन् र मार्केट अवश्य नै माथि जानेछ ।’

यो दिन नेप्सेमा सूचीकृत १३ वटा समूह मध्ये एउटा बाहेक अन्य सबैमा रातो पोतियो । आज म्युचुअल फण्ड समूह मात्रै बढ्यो । यो समूह आज ०.३९ प्रतिशतले बढ्यो ।

हाईड्रो समूह आज सर्वाधिक अर्थात ०.६६ प्रतिशतले घट्यो । बैंकिङ समूह पनि आज ०.०५ प्रतिशत, विकास बैंक ०.२९, फाइनान्स ०.५७, होटल ०.१३, लगानी ०.३२, जीवन बीमा ०.२१, उत्पादन तथा प्रशोधन ०.४२,लघुवित्त ०.२९, निर्जीवन बीमा ०.३५, अन्य ०.३९ र व्यापार ०.०२ प्रतिशतले घट्यो ।

धेरै कारोबार गर्ने कम्पनीहरु

आज श्रीनगर एग्रोटेकको सर्वाधिक सेयर कारोबार भयो । आज यो कम्पनीको २६ करोड ३९ लाख बढीको सेयर कारोबार भयो ।

यस्तै ङादी ग्रुप पावरको १७ करोड ८ लाख, युनिभर्सल पावरको ११ करोड ६१ लाख र सागर डिस्टिलरीको १० करोड ६९ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ३ वटा कम्पनीको सेयरमूल्यमा अपर सर्किट लाग्यो । आज स्वस्तिक लघुवित्त, मुक्तिनाथ कृषि कम्पनी र एसवाई प्यानलको सेयरमूल्यमा अपर सर्किट लाग्यो ।  

यस्तै लक्ष्मी लघुवित्तको सेयरमूल्य ८.७६ प्रतिशत, थ्रिस्टार हाईड्रोको ७.१४ र तेह्रथुम पावरको सेयरमूल्य २.८४ प्रतिशतले बढ्यो ।

यो दिन झापा इनर्जीको सेयरमूल्य सर्वाधिक अर्थात ९.३० प्रतिशतले घट्यो । हिमस्टार उर्जाको सेयरमूल्य पनि आज ५.०५ र सुपर मादी हाईड्रोको सेयरमूल्य ४.५९ प्रतिशतले घट्यो ।