बजारमा अनौठो प्रवृति: दीपेन्द्र अग्रवाल पक्राउ पर्दा मूल्य घट्ने, छुट्दा मूल्य बढ्ने

काठमाण्डौ । नेपालको सेयर बजारमा बेला बेला अनौठो प्रवृति देखिने गर्छ । विशेष गरी दोश्रो बजारमा हुने कारोबारमा निश्चित व्यक्ति वा सेयर खेलाडीको जीवनमा हुने उतारचढावले उसले चलाउने कम्पनीको मूल्य प्रदर्शनमा  समेत अनौठो उतारचढाव देखिने गरेको हो । उदाहरणको रुपमा दीपेन्द्र अग्रवाल र उनले चलाउने केही स्क्रीप्टलाई लिन सकिन्छ ।  

दश दिनअघि उनलाई धितोपत्र बोर्डको सिफारिसमा प्रहरीको केन्द्रीय अनुसन्धान ब्यूरो(सीआईबी)ले नियन्त्रणमा लिएपछि खुलेको बजारमा उनले चलाउने ठानिएका कम्पनीको सेयरमूल्य तीव्र गतिमा तल झरेको थियो । 

कर्पोरेट डेभलपमेन्ट बैंक, सप्तकोशी डेभलपमेन्ट बैंक, सिन्धु विकास बैंक, ग्रीन डेभलपमेन्ट बैंक लगायतका स्क्रिप्टलाई बजारमा दीपेन्द्र अग्रवालले चलाएका स्क्रीप्टको रुपमा बुझ्नेहरु धेरै छन् । यही बुझाईका कारण अग्रवाल सीआईबीको हिरासतमा पुगेपछि खुलेको बजारमा यिनै कम्पनीको मूल्य धेरै घट्न पुगेको थियो ।  

हिजो(आइतबार) काठमाण्डौं जिल्ला अदालतको आदेशमा धरौटीमा अग्रवाल रिहा भए । रिहा भएलगत्तै आज(सोमबार) कारोबार खुलेपछि अग्रवालले चलाएको भनिएको कम्पनीको सेयरमूल्यमा बढोत्तरी देखियो । 

अग्रवालले ठूलो कित्ता होल्ड गरेका भनिएको कर्पोरेट डेभलपमेन्ट बैंकको मूल्य १०० रुपैयाँ प्रतिकित्ता(करिब ७ प्रतिशत)ले बढ्यो । सप्तकोशी डेभलपमेन्ट बैंकको मूल्य ६.५४ प्रतिशतले बढ्यो भने ग्रीन डेभलपमेन्ट बैंकको मूल्यमा झण्डै ६ प्रतिशत हाराहारीको बढोत्तरी देखियो । सोमबार धेरै मूल्य बढ्ने पाँच कम्पनीको सूचीमा ३ वटा अग्रवालले चलाएका स्क्रीप्टहरु नै परे ।  

अग्रवाल यसअघि पनि पक्राउ पर्दा बजारमा यस्तै प्रवृति देखिएको थियो । उनी पक्राउ परेलगत्तै उनले चलाएका स्क्रीप्टहरुको मूल्य तीव्र गतिमा तल झरेको थियो । जब छुटे, त्यसपछि फेरि मूल्य उकालो लाग्यो ।

विज्ञहरुले कुनै व्यक्ति विशेषलाई हेरेर कुनै पनि कम्पनीको सेयरमूल्य तलमाथि जानु स्वस्थ बजारको विशेषता नभएको टिप्पणी गरेका छन् । उनीहरु भन्छन्- 'स्वस्थ र सन्तुलित बजार त त्यो हो, जहाँ वित्तीय स्वास्थ्य तथा लाभांश क्षमतालाई आधार बनाएर कुनै पनि कम्पनीको मूल्य तलमाथि हुन्छ । कुनै व्यक्ति विशेष पक्राउ पर्दा मूल्य घट्नु र छुट्दा मूल्य बढ्नू परिपक्व बजारको विशेषता नै होइन ।'