१२०% ले बढ्यो मितेरी डेभलपमेन्ट बैंकको नाफा, नयाँ व्यवसायिक रणनीतिका कारण कर्जा प्रवाह समेत वृद्धि

काठमाण्डौ । मितेरी डेभलपमेन्ट बैंकले चालु आवको दोस्रो त्रैमासिक प्रतिवेदन सार्वजनिक गरेको छ । बैंकले सार्वजनिक गरेको प्रतिवेदन अनुसार बैंकको नाफा बढेको छ ।

बैंकले दोस्रो त्रैमाससम्म ५ करोड ७० लाख रुपैयाँ खुद नाफा आर्जन गरेको छ । यो रकम अघिल्लो आवको सोही अवधिको तुलनामा १२०.२५ प्रतिशतले बढी हो । अघिल्लो आवको सोही अवधिसम्म बैंकको खुद नाफा २ करोड ५८ लाख रुपैयाँ थियो ।  

यो अवधिमा बैंकको खुद ब्याज आम्दानी पनि बढेको छ । अघिल्लो आवको दोस्रो त्रैमाससम्म ८ करोड ५८ लाख रुपैयाँ रहेको बैंकको खुद ब्याज आम्दानी बढेर १४ करोड ४६ लाख रुपैयाँ पुगेको छ ।  

बैंकको अन्य सञ्चालन आम्दानी पनि बढेको छ । अन्य सञ्चालन आम्दानी ४२ लाख १५ हजार रुपैयाँबाट बढेर ५५ लाख ३१ हजार रुपैयाँ पुगेको छ । यस्तै बैंकको खुद सञ्चालन आम्दानी पनि ९ करोड ९ लाख रुपैयाँबाट बढेर १४ करोड ७२ लाख रुपैयाँ पुगेको छ ।  

१ अर्ब २१ करोड रुपैयाँ चुक्तापूँजी भएको बैंकको रिटेन्ड अर्निङ ६ करोड ७९ लाख र रिजर्भको आकार ३७ करोड रुपैयाँ रहेको छ । यो अवधिमा बैंकले खराब कर्जा अनुपात घटेको छ । अघिल्लो आवमा १.७४ प्रतिशत रहेको खराब कर्जा अनुपात घटेर ०.४५ प्रतिशतमा सीमित बनेको छ ।  

कर्जाको घट्दो ब्याजदर र सुस्त आर्थिक क्रियाकलापका बाबजुत बैंकले नयाँ व्यवसायिक रणनीति अबलम्बन गर्दै कर्जामा अघिल्लो आवको तुलनामा उल्लेख्य वृद्धि हासिल गरेको छ । बैंकले यो अवधिमा ६ अर्ब ५६ करोड रुपैयाँबराबरको कर्जा प्रवाह गरेको छ । अघिल्लो आवमा भने बैंकले ५ अर्ब १७ करोड रुपैयाँबराबरको कर्जा प्रवाह गरेको थियो ।

यस्तै बैंकको निक्षेप संकलन पनि उल्लेख्य बढेको छ । अघिल्लो आवमा ६ अर्ब ५० करोड निक्षेप संकलन गरेको बैंकले चालु आवमा भने ८ अर्ब ३८ करोड रुपैयाँबराबरको निक्षेप संकलन गरेको छ ।

बैंकको वितरणयोग्य मुनाफा ६ करोड ७९ लाख रुपैयाँ र वार्षिक वितरणयोग्य प्रतिसेयर आम्दानी ७.७६ रुपैयाँ रहेको छ ।

समीक्षा अवधिसम्म बैंकको प्रतिसेयर आम्दानी(ईपीएस)९.३७ रुपैयाँ, प्रतिसेयर नेटवर्थ १३५.९८ रुपैयाँ, मूल्य आम्दानी अनुपात ६४.१० गुणा र तरलता अनुपात ३३.१४ प्रतिशत कायम भएको छ ।